Pruik of haarverlengings?
As jy jou hele kop wil bedek, is ’n gewone pruik of kant-pruik die antwoord.
Met ’n kant-pruik word die hare aan ’n basis van kantmateriaal geheg wat jy dan oor jou kop trek. Dit lyk of die hare vanuit jou eie kopvel groei en die voordeel is dat jy verskillende style kan skep. Jy kan byvoorbeeld steeds jou hare vleg en in ’n poniestert vasmaak. Dit is perfek as jy baie van jou hare verloor het weens alopesie (’n outo-immuunsiekte wat dramatiese haarverlies veroorsaak) of chemoterapie. Met ’n gewone pruik kan jy nie die haarstyl van die pruik verander nie. Is dit byvoorbeeld in ’n bob gesny, kan jy dit nie vasmaak nie, omdat die lyne van ’n pruik meer sigbaar is. Dit is ook goedkoper as ’n kant-pruik, sê Candice.
Haarverlengings is ideaal as jy jou eie hare voller of langer wil laat lyk.
Candice stel die verlengings wat aanplak ( tape-ins) of aanknip ( clip-ins) voor omdat dit jou eie hare die minste beskadig. (Verlengings wat aan jou hare gegom of met ’n mikroringetjie vasgeheg word, is ook beskikbaar.) Aanplak-verlengings het ’n strokie wat bo-oor jou eie hare by die wortels geplak word en weer met alkohol verwyder word. Dit hou sowat 2 tot 3 weke. Aanknip-verlengings het ’n kammetjie wat in jou hare glip. Jy kan dit insit en uithaal soos jy wil. Dit kan egter te swaar voel vir vroue met fyn hare, sê Candice.
Dit is die moeite werd om ’n gesigborsel aan te skaf, want dit maak jou vel goed skoon. Dié bekostigbare borsel se kop bevat sowat 150 000 fyn diggepakte haartjies wat liggies oor jou vel vibreer sodra jy die borsel aanskakel. Dit werk sagkens om jou porieë oop te maak en vuilheid te verwyder en gee ook jou vel se bloedsirkulasie ’n hupstoot. Spuit soggens en saans ’n bietjie gesigwasmiddel op die borsel, skakel dit aan en beweeg sowat ’n minuut oor jou hele gesig. Suiwer mineraalwater vanuit ’n bron in die Franse dorpie Avène is deel van al die produkte van die velsorghuis Eau Thermale Avène. Dié water herstel jou vel se natuurlike phbalans en is geskik vir ’n sensitiewe vel. ’n Nuwe serum bevat ’n hoë konsentrasie van dié mineraalwater wat in mikrokapsules vasgevang is en só dieper jou vel penetreer om dit te bevog. Die nuwe vogroom sorg dat vog deur die dag in jou vel behoue bly en bied ook sonbeskerming.