‘Vryheid DIS DIE DING VAN MODE’
Met haar stylvolle trouen aandrokke en sjiek dagdrag is modeontwerper Suzaan Heyns van Johannesburg een van SuidAfrika se toonaangewende kreatiewe kragte. Aan modetendense steur sy haar nie – sy skep haar eie!
lys die ellendes een vir een, rustig. Dit was ’n Blou Maandag. Die geiser het opgepak, die motor het gaan staan . . .
Maar Suzaan Heyns, veelbekroonde modeontwerper, is gewoond aan bruide wat op die nippertjie hul trourok weer moet aanpas, of groot opdragte waaraan sy deurnag werk. Uit haar kalm stemtoon is dit duidelik sy word nie sommer “gegooi” nie.
As kleuter, waar sy aan die voete van ouma Hettie (Coetzee) by die naaimasjien knopies getel het, het sy al besef: kleremaak is haar ding.
“Ouma en ek is gereeld na die Oosterse Plaza in Fordsburg [in Johannesburg] en het die mooiste lap gekoop. Naweke het sy my klere gemaak. Ek het besef sy kan enigiets maak wat ek begeer het. Dit is nou nog vir my die amazing ding van mode. Daai vryheid,” sê Suzaan. “Dit is ’n groot voorreg om elke dag te doen waaroor ek mal is.”
Sy skrik nie vir uitdagings nie. Sy wil juis bewys enigiets is moontlik. “My modes innoveer, ek glo jy moet grense verskuif.”
In die modewêreld word na die “dualiteit” in haar modes verwys. Sy lag. “Ek kombineer ongewone dinge – haaitande met iets vrouliks. Ek geniet avant-garde, die buitengewone, maar ek glo ook daaraan om fantasie in die alledaagse te omskep.” Sy hou van klere vol verrassings.
Onlangs het sy en die kristalmaker Swarovski saamgespan met stilis en kreatiewe direkteur Juanita Kotzé om die verskillende fases in ’n vrou se lewe uit te beeld toe sy deelgeneem het aan die Cycles- aanbieding van Jackie Burger van die mode-opskietstylsalon Salon 58 op Stellenbosch. Die kristalle het geskitter op uitrustings wat sy vir agt vroue moes ontwerp – onder andere die aktrise Tinarie van WykLoots, Deona van Vuuren van die Cape to Cairo-antiekwinkel en Cape to Cuba-restaurant in Kalkbaai, en kunstenaar Shany van den Berg. “’n Mens het mos ’n sekere beeld van Swarovski-juweliersware – baie verfynd, edel. Ek het dit op verskillende maniere ingespan om ‘persoonlikheid’ aan die skeppings te gee,” vertel sy.
Suzaan se klere word ook gereeld in SARIE se voorbladfotosessies en die Voorbladgesig-wedstryd gebruik omdat sy glo die tydskrif versinnebeeld ’n kontemporêre vrou wat by haar modes aanklank vind.
Haar klankbord is haar man, Willem Kitshoff, uitvoerende kreatiewe direkteur by ’n advertensieagentskap in Johannesburg. “Ons is al sedert ons sewe jaar oud is beste pêlle en het saam-saam grootgeword. Jy kan byna sê ons persoonlikhede is soos ’n verlengstuk van mekaar se ontwikkeling. As dit sin maak.”