2017-’18 #CARSAWARDS SA SE BESTE MOTORS
Dit was ’n aand van styl en swier! Maar dit was Suzuki wat die sjampanjeproppe laat skiet het by Cars.co.za se Verbruikerstoekennings vir 2017-’18. Suzuki het nie net sy titel as Handelsmerk van die Jaar verdedig nie, maar ook weggestap met die louere in die kategorieë Sakpasvoertuig en Kompakte Gesinsmotor van die Jaar. Ook Mercedes-benz, Toyota, BMW, Volvo en Mazda het vanjaar ’n draai op die verhoog gemaak.
Die toekennings, wat deur Wesbank geborg word, is onlangs by ’n glansryke geleentheid by die Galleriakonferensiesentrum in Sandton oorhandig, met die radiopersoonlikheid Anele Mdoda as die sjarmante gasvrou. Haar medeaanbieder was Art, ’n bekkige rekenaar wat die benoemings en die wenners in elke kategorie aangekondig het, en ’n gepaste herinnering aan hoe innoverend die motorbedryf geraak het.
Altesame 20 vervaardigers en 39 modelle het dit in 13 kategorieë uitgespook. Die beoordelaarspaneel het bestaan uit ’n uitgelese groep motorverslaggewers en radiopersoonlikhede, maar ook hulle moes vir die seremonie wag om die name van die wenners te hoor. En in 5 van die 13 kategorieë is die beoordelaars se gunsteling nié as die wenner aangewys nie. Die rede hiervoor is die unieke beoordelingstelsel: 50% van die finale telling word deur die publiek se terugvoering in ’n eienaarstevredenheidspeiling bepaal. Naverkopediens is dus deurslaggewend.
“Met 50% van ’n motor se finale telling wat deur die handelsmerk se algehele prestasie in die eienaarstevredenheidspeiling bepaal word, staan die motor eers ’n goeie kans om te wen as dit ’n goeie produk is, uitstaan vir die beoordelaars en as die handelsmerk goeie naverkopediens lewer,” sê Hannes Oosthuizen, verbruikerservaringbestuurder van Cars.co.za. “En dis deurslaggewend vir #Carsawards, want motorverkope gaan oor meer as net die koop van ’n produk. Dit gaan ook oor die koop van ’n handelsmerk en die vestiging van ’n verhouding met die handelsmerk.”
Bekendes soos Derek Watts, Gareth Cliff, DJ Fresh en Boity Thulo het in hul swierige uitrustings die geleentheid bygewoon.
Tydens ’n jaarlikse besoek aan die dokter word Nadine en haar man, Pierre, se lewe omver gewerp wanneer sy hoor sy het borskanker. Nadine hanteer dit glad nie goed nie; sy blameer haarself en voel skuldig. Pierre besef nie die omvang van die hele situasie nie, maar gou is hy die een wat sterk en staande moet bly ter wille van Nadine. Haar onkoloog se eie huislike omstandighede raak moeilik vanweë die optrede van haar dwelmverslaafde seun. Sy moet by al haar werksverpligtinge uitkom, haar huwelik red, en haar gesin bymekaar hou.
Die verhaal laat jou besef dat ander mense se lewe duister is, totdat jy 30 dae in hul skoene geloop het. Ek het Pierre uit my hart jammer gekry, en was meer as een keer in trane. Gelukkig het die verhaal vir albei gesinne goed geëindig.