In jou skoonheidswêreld dié maand…
Jou sproete, vlekke ontmasker | In sonnige Suid-afrika is dit moeilik om pigmentasie te ontduik. Maar met die regte kennis kan jy dié verkleuring van jou vel verbeter, selfs voorkom 1
proete is mooi, maar donker vlekke op jou gesig en lyf is een van die grootste velsorgbekommernisse waarmee SuidAfrikaanse vroue en mans sukkel. Buiten dat ’n onegalige velkleur jou selfbeeld kan knou, meen kenners dit kan tot tien jaar by jou ouderdom voeg. Dié donker vlekke word hiperpigmentasie genoem en kan wissel van sproete tot groter vlekke wat oor jou hele gesig strek.
Ongelukkig is dié vlekke ook van die moeilikste velprobleme om te takel, sê dr. Maureen Allem, stigter en mediese hoof van die Renewal Institute, waaronder die estetiese kliniekgroep Skin Renewal val. “Eerstens is daar ’n magdom snellers wat die vorming van bruin vlekke veroorsaak. Tweedens kry jy ook verskillende soorte pigmentasie en nie elkeen kan noodwendig met dieselfde ‘resep’ behandel word nie.”
Hiperpigmentasie is die gevolg van klein tentakelagtige selle aan die onderkant van jou vel se epidermis, genaamd melanosiete, wat die pigment melanien afskei. Soms, weens verskillende faktore, word hierdie selle oorstimuleer en vervaardig dit meer melanien as normaalweg. Soos die pigment na die veloppervlak beweeg, vorm dit bruin, oneweredige vlekke wat mettertyd al hoe meer sigbaar word.
’n Helderder, jonger vel ís wel binne jou bereik met die regte kombinasie behandelings en velsorgprodukte. Die eerste stap is om te bepaal watter soort pigmentasie jy het. Dr. Allem verduidelik daar is hoofsaaklik vier tipes:
PIGMENTASIE WEENS SONBLOOTSTELLING
Die grootste sondaar wat jou vel laat verkleur, is blootstelling aan die son se skadelike Uv-strale. Melanien werk soos ’n natuurlike sonskerm vir jou vel deur die Uv-lig te absorbeer wat deur jou vel dring sodat dit nie dieper selle beskadig nie (dié proses gee jou ’n sonbruin gelaat). Wanneer die son jou vel gereeld brand, veroorsaak dit dat meer pigment afgeskei word, saambondel en na die buitenste laag van jou vel beweeg. Die vlekke wissel in grootte en kom hoofsaaklik voor op die agterkant van jou hande en op jou gesig, skouers en bo-rug. Dit word dikwels ouderdomsvlekke genoem omdat dit meer word soos jy ouer word. Vroue wat met natuurlike sproete geseën is, het dit in die verlede dalk probeer verbloem, maar deesdae raak dit al hoe gewilder om eerder jou sproete te beklemtoon. En hoekom nie? Dit laat jou gesig jeugdig en sonbruin lyk en wys jy omarm jou vel se natuurlike voorkoms. Dink maar aan die aktrise Meghan Markle, prins Harry se verloofde, wat verlede jaar op die tydskrif se Oktober-voorblad met haar sproete duidelik sigbaar verskyn het. (Lees meer op bl. 83.) Laat jou sproete deurskyn deur ’n ligte, romerige onderlaag net waar dit die meeste nodig is, aan te wend. Of teken sommer ’n paar sproete met ’n bruin oogpotlood op jou gesig. Daar is selfs ’n skoonheidsgier om sproete op jou gesig te laat tatoeëer! So terloops, Adwoa Aboah, 2017 se model van die jaar, spog met ’n gesig vol mooi sproete.
3HIPOPIGMENTASIE
Hipopigmentasie behels dat ’n gedeelte van jou vel pigmente verloor en dan wit, pleks van donker vlekke vorm. Dié wit vlekke het ook baie verskillende oorsake en kan vorm weens ’n besering, sonskade of selfs sekere outo-immuunsiektes. Hoe behandel jy dit? Besoek jou dokter om te bepaal wat die oorsaak van die verlies aan pigment is. In baie gevalle kan dit egter nie behandel word nie, aangesien die selle wat die vel se kleur vervaardig, vernietig is, sê dr. Allem.
PIGMENTASIE WEENS HORMOONSKOMMELINGE
Hormoonveranderinge in jou lyf wanneer jy die Pil gebruik of swanger is, veroorsaak pigmentasie wat bekend staan as melasma. Dit kom gewoonlik voor as ’n paar groot, oneweredige vlekke op jou gesig eerder as individuele kolle. Jy sien dit op jou wange, bo-lip, neusbrug, voorkop en by jou haarlyn en kakebeen. Hoe behandel jy dit? Melasma is van die moeilikste tipes pigmentasie om te behandel omdat dit deur interne faktore veroorsaak word, waarna blootstelling aan Uv-lig dit net vererger, sê dr. Allem. Sy raai aan dat jy eers jou mediese dokter besoek om bv. jou liggaam se hormoonvlakke en die gesondheid van jou spysverteringstelsel te ondersoek. Daarna kan ’n estetiese dokter behandelings en produkte voorskryf wat die hoeveelheid melanien onderdruk wat jou vel vervaardig.
PASOP!
Vermy laser- en chemiese afskilferingsbehandelings ( as jy melasma het. Omdat dié pigmentasie dikwels diep onder jou vel lê, lewer afskilfering nie doeltreffende resultate nie.
1. Die goue reël om verdere donker vlekke te voorkom is om daagliks, winter en somer, ’n goeie sonskerm met ’n SBF van minstens 30 te gebruik. Maak ook seker die sonskerm beskerm jou vel teen UVA- en Uvb-strale. 2. Maak velsorgprodukte wat antioksidante soos vitamien A, C en E bevat, deel van jou daaglikse velsorgroetine. Antioksidante beskerm jou velselle en maak jou vel meer bestand teen sonblootstelling. Jy kan dit ook as aanvulling drink. 3. Kies produkte wat spesifiek geformuleer is om jou vel te verhelder en die oorvervaardiging van melanien onderdruk. Kyk bv. uit vir produkte met die woorde brightening of lightening op die verpakking.
PROBEER DIÉ ESTETIESE BEHANDELINGS
1. Laser- en ligbehandelings soos Pulsed Dye Laser en Intense Pulsed Light: 2. Chemiese en laserafskilferingsbehandelings soos Fraxel en ipixel: Die boonste lae van jou vel word afgeskilfer met sure of ’n fraksionele laserstraal. Dit help om pigmentasievlekke weg te skaaf sodat dit mettertyd ligter lyk. 3. Naaldlose mesoterapie: Spesifieke aktiewe bestanddele word met ’n spesiale toestel deur middel van drukking in jou vel “geskiet” om pigmentasievlekke op te breek. Dit werk veral goed vir hormonale pigmentasie omdat die kans vir inflammasie kleiner is. 4. Cosmelan- en Dermamelanbehandelings: Dié twee omvattende behandelings is spesifiek ontwikkel om erge pigmentasie te behandel en sluit ’n professionele gesigbehandeling en die gebruik van spesiale velsorgprodukte tuis in. Dit werk deurdat dit die ensiem tirosinase, wat melanien vervaardig, blokkeer.