GEDULD ’N HOOFBESTANDDEEL
Die “5 minute met Ciska Rossouw” (Ons hou van, November 2017) het my gedagtes teruggevoer na my skoonma se kombuis soos dit was gedurende die sewentigerjare. Bak was haar lewe.
Eenkant was die inmaakfles waarin haar aartappelsuurdeeg-plantjie, knus toegedraai, gegroei het.
Spesiaal vir haar deur iemand gemaak, was haar ekstragroot broodpanne. Een sny was gelyk aan vier hedendaagse snye brood! Rêrig!
Gaan ons kuier, was die brode al byna uit die oond, maar gelukkig was daar vir ons en die kinders heerlike vetkoeke van die oorskiet- brooddeeg, eetgereed in ’n emaljeskotteltjie. Gou is dit oopgebreek en met tuisgemaakte botter en gouestroop gevul. Salig!
Haar boerbeskuit was legendaries, veerlig en baie gesog.
Nes vir Ciska, was een van die hoofbestanddele in haar voortreflike bakwerk geduld.