Brand, Peet Venter (Lapa Uitgewers, R270)
Die roman speel af in die huidige politieke landskap van Suid-afrika en was vir my ontstellend realisties.
Die titel, Brand, is meerduidig: Thys, ’n voormalige speurder, werk nou vir ’n geheime organisasie en ontmoet vir Delaré Brand. Saam met haar word hy ingetrek by ’n komplot wat tot by die hoogste regeringskringe strek. Die mense van Suid-afrika is keelvol en kom in opstand. Die land bránd. En dan is daar iemand wat probeer breek deur die brandmuur van die rekenaarstelsel by Thys se werk.
Sy speurwerk lei tot ontstellende bewyse van korrupsie op alle vlakke. Dit lyk nie asof die woord demokrasie meer op dié land van toepassing is nie.
Thys se lewe draai om drie vroue: Liesl ’n ITspesialis, sy halfsuster Karen, en Delaré, wat gefassineer is deur die donker bewussyn van die web en die duister werking van die menslike psige. Hy probeer desperaat om die vroue in sy lewe te beskerm.
Die skrywer bied geen maklike oplossings nie en spaar ook nie die leser se emosies nie.