Nataniël sê . . .
Kersfees! Op Kaalkop word geen feesmaal afgeskeep nie. Al word tradisies verbreek. Idees vir hierdie seisoen lyk tans só: DIE FORMELE TAFEL: Vir Oukersaand, ’n pragtige tafel met kristal, kerslig en ’n boom vol engele. Spyskaart Komkommer in crème fraîche (vir 6 mense) Skil 3 komkommers, verwyder saadjies en sny in dun skyfies. Meng koppie crème fraîche met 3 gekapte sprietuie, 6 gekapte kruisementblare, 1 teelepel grofgemaalde swartpeper en die fyngerasperde skil van suurlemoen. Vou komkommer by. Bedien met snytjies tuisgebakte neutbrood. Eend met kersies Stop ’n eend met uie, knoffel en seldery, geur met sout en rooster in die oond. Plaas die eend op ’n opdienbord. Verwyder vet uit die oondpan, plaas die pan op ’n warm plaat, voeg vars kersies en sjerrie by, sautée. Bedien met gestoomde aartappeltjies. Nartjiekoekstruif Maak ’n koekstruif van lae vrugtekoek, whisky, tuisgemaakte vla, geroosterde amandelskyfies en gekapte nartjieskil. DIE TUINTAFEL: Vir wanneer ons onder die bome ’n lang tafel dek en informeel kuier. Spyskaart Makrielslaai en linte Gebruik ’n groenteskiller om geelwortels, komkommer en zucchini in linte te sny. Plaas in groot slaaibak met gevlokte gaar makriel, jong tamaties en gekapte pietersielie, besprinkel met slaaisous van olyfolie, suurlemoensap, heuning, sout en swartpeper. Oondgebraaide hoender en druiwe Hoenderporsies, gegeur, met ontbytspek toegedraai en met brandewyn en olyfolie besprinkel, word in die oond gebraai. Voeg hande vol pitlose groen druiwekorrels by vir die laaste 10 minute. Panna cotta met skildery-vrugte Panna cotta is maklik om vooraf te maak en oornag te laat stol in individuele vormpies, en vanielje of witsjokolade is gewilde geure. Bedien met gesnyde vrugte soos vye, perskes of granate. DIE VINNIGE TAFEL: Sommige moet werk tot 24 Desember en vinnig inkopies doen, maar wil nog steeds met skoonheid en smaak onthaal. Spyskaart Landery-slaai Jong aartappels in die skil gekook, groenboontjies geposjeer tot heldergroen en geblikte witbone. Plaas op ’n mooi opdienbord, rangskik dun uieringe bo-op. Sprinkel met olyfolie en wynasyn. Geur met seesout en swartpeper en versier met grasuie. Skaaptjops in die oond Meng sout, peper, gekapte pietersielie, gekapte roosmaryn, gekapte kruisement, suurlemoensap en olyfolie saam, vryf skaaptjops met die mengsel, laat staan vir 1 uur (of oornag in die yskas) en bak in die oond volgens voorkeur. Pynappel-carpaccio met vanieljekoekies Sny ’n groot ryp pynappel in baie dun skyfies, sprinkel met suiker, rum, lemmetjiesap en fyngerasperde lemmetjieskil, bedien met vanieljekoekies of brosbrood. DIE ONTBYTTAFEL: Oukersaand is dikwels die grootste geleentheid. Kersoggend bestaan dan uit ’n spesiale laatontbyt. (Geen middagete, ons vergader later in die dag.) Spyskaart Jogurt met lemmetjie en heuning (per persoon) Meng
koppie Griekse jogurt met die sap van lemmetjie en 1 eetlepel heuning. Skep in ’n bakkie en strooi 1 koppie vars gemengde bessies bo-oor. Roereier met kreef Klits 2 eiers per persoon met 1 eetlepel vars room per persoon. Verhit botter in ’n pan oor lae hitte, voeg eiers by, moenie roer nie, stoot spaan stadig deur totdat die eiers byna gaar is, verwyder van die hitte en roer gaar gevlokte kreef (2 koppies vir 6 persone) by. Geur liggies met sout, mildelik met swartpeper. Sprinkel met vars pietersielie, bedien met roosterbrood. (Gerookte salm is ook heerlik!) DIE NAMIDDAGTAFEL: Wanneer almal eers in die namiddag kan saamwees. Spyskaart Appel-en-bloubessiekoek Gebruik ’n pondkoekresep, vervang die meel met amandelmeel, voeg ’n ekstra koppie amandelmeel by, vou 2 gekapte appels en 1 koppie vars bloubessies by beslag. Bak volgens die resep, laat afkoel en sif versiersuiker oor. Vetkoekies met roosblare Gebruik tradisionele vetkoek- of doughnutresep. Bak klein vetkoekies in olie, doop in ’n stroop van suiker en roos-ekstrak, en bedien met vars organiese roosblare. Somercrostini Rooster dun snytjies Italiaanse brood. Plaas ’n skyfie sterk kaas, ’n skyfie ryp tamatie en ’n klein bietjie fyngekapte rooi-ui bo-op elke sny. Geur liggies met sout en bedruip met olyfolie. Versier met vars basiliekruid.