Leesdinge
DEUR WATER & VUUR, Karin Combrinck (Lux Verbi, R255)
Jennifer se pa het spoorloos verdwyn. Nóg haar stiefma nóg sy vriende of die polisie weet waar hy is. Sy huur ’n private speurder om hom te soek. In die proses word ’n geheim oor bejaardemishandeling onthul. Jennifer se loutering bring vir haar aanvaarding, wysheid en die besef dat sy haar huwelik kan red.
THE WISDOM OF SALLY RED SHOES,
Ruth Hogan (John Murray, R300) Masha het emosioneel ophou bestaan toe haar tweejarige seun verdrink het. Twee eksentrieke vroue kruis haar pad en stadigaan begin sy weer belangstel in die lewe. Empaties, hartroerend en subtiel. Maak reg vir ’n verrassende kinkel aan die einde!
AL WAT OORBLY,
Santie van der Merwe (Lapa Uitgewers, R265)
Toe sy ses was, is Julia se ma oorlede en het sy ’n ongenaakbare stiefma gekry. As volwassene kelder Julia haar verhouding met haar geskeide buurman, want sy wil nie ’n aaklige stiefma wees nie. Sy moet haar herinneringe aan haar ma en stiefma in oënskou neem om by die waarheid uit te kom sodat liefde kan seëvier.
SLEEPER,
Mike Nicol (Umuzi, R250) Internasionale spioene, komplotte by die dosyne, uraandiefstal, ’n vuilbom en politici met nog vuiler hande maak hierdie opwindende verhaal geweldig relevant in die tyd waarin ons leef. Nicol trek die drade vernuftig saam om dié boeiende spanningsverhaal te laat uitspeel.
BRIEWE UIT BRIELSHOOP,
Helene Olivier (Protea Boekhuis, R220)
Die pynlike maar raak waarnemings oor die tydsgees waarin die briefroman afspeel, is treffend. Henna erf ’n plaas, en sy en haar man word naweekboere; sy meer as hy. Sy moet haar herkoms trotseer om antwoorde oor haar voorsate te kry. Sy leer ook die harde werklikheid oor boerdery. “Dis genade die boerdery, net suiwer genade” (bl. 177).
AS SY WEER KOM, Marlize Hobbs (Naledi, R200)
’n Roerende verhaal waarin die hoofkarakter, Iza, probeer sin maak van die lewe deur gesprekke met haar alter ego’s. Sy deel op intieme wyse haar worsteling oor identiteit, seksualiteit en geloof. “My herinneringe is vervleg met die virtuele werklikheid wat ek daagliks in verhaalvorme uittik” (bl. 28).
TEBATSO GAAN SEE TOE, Maya Fowler (Protea Boekhuis, R190)
Desember 1984 gaan drie generasies Vrystaatse Afrikaners see toe vir vakansie. Tebatso gaan saam om te help. Dis haar eerste kennismaking met die see. Uit Tebatso se oogpunt sien ons hoe die politiek van die verlede ’n impak op gewone mense se lewens gehad het. Haar verhaal tref jou soos ’n vuishou in die maag.
THE PAPER LOVERS,
Gerard Woodward (Picador, R400) Arnold Proctor se terloopse buite-egtelike verhouding met godsdienstige Vera ontwrig alles in sy lewe. Sy vrou het ’n suksesvolle winkel waar sy haar handgemaakte papier verkoop. Papier word die simbool van ’n verhaal oor liefde en verraad waarin godsdiens en seksuele obsessie ondersoek word.
PROOI,
Deon Meyer (Human & Rousseau, R320)
Bennie Griessel en Vaughn Cupido ondersoek die onopgeloste moord op ’n oudpolisieman op ’n luukse trein. Hulle krap met moeite ’n nes van onheilige sameswerings oop. Wanneer hulle staatskaping en ’n moordkomplot oor landsgrense vermoed, word druk van bo af op hulle geplaas om die moord af te maak as selfdood. Die beste Griessel-verhaal nog!
STRANGERS WITH THE SAME DREAM,
Alison Pick (Headline UK, R320) Palestina 1921, in die tyd toe Israel gevestig word. ’n Idealistiese groepie begin ’n kibboets op grond wat eens aan Palestyne behoort het. Drie karakters se vertelling van dieselfde gebeure vanuit hul eie verwysingsraamwerk maak dié onthutsende verhaal onvergeetlik.