BOEKE OOR MENSE
WEERKLINK VAN ’N WANKLANK, Pieter-dirk Uys (Tafelberg, R280)
Pieter-dirk Uys se verbluffend eerlike memoires oor sy eie familie en kinderjare, sy moeilike, musikaalgedrewe pa, sy briljante, geheimsinnige ma en sy suster, die pianis-wonderkind, is boeiend. Hy vertel hoe Sannie Abader die Uyshuishouding regeer het en dat sy vir hom ’n tweede ma was. Sy herinneringe neem jou van sy kinderjare regdeur sy lewe, al sy vreugdes en sy hartseer; hoe Evita Bezuidenhout gebore is en haar rol in sy merkwaardige lewe. Inspirerend.
OOR GRENSE, Ton Vosloo (Jonathan Ball, R275)
Dié koerant- en sakeman se memoires gee ’n oorsig oor sy loopbaan by Naspers en hoe die maatskappy onder sy en Koos Bekker se leierskap tot een van die wêreld se toonaangewende internetmaatskappye uitgebou is. Die agter-die-skerms-kykie na Ton se 59 jaar lange loopbaan gee insig in hoe die media in Suid-afrika polities en ekonomies moes aanpas om te oorleef.
HANLIE RETIEF GESELS MET 2, Hanlie Retief (Protea Boekhuis, R250)
Die boek is ’n versameling van 50 uiteenlopende onderhoude wat Hanlie tussen 2011 en 2018 gevoer het. Dis onderhoude wat geïnspireer het of waaroor mense lank gepraat, kwaad geword of gelag het. Daar’s onder meer gesprekke met Karen Zoid, Elvis Blue, Tim Noakes, Ans Botha, Mosiuoa Lekota, Piet Croucamp, Max du Preez en Hermann Giliomee. In Koelsoem en Flori se onderhoud lees jy dat hul kos nie net vir jou maag is nie, “dis vir die ander honger ook, dis kos vir jou hart” (bl. 233).
DIE KEER TOE EK MY NAAM VERGEET HET, F.A. Venter (Protea Boekhuis, R200)
Skrywer F.A. Venter vertel aangrypend hoe hy van vooraf moes leer loop, praat en skryf nadat hy ’n beroerte gehad het. Hy skryf emosioneel oor sy vrou, Stella, hul verhouding en hul toegewyde liefde. Die universele en tydlose temas van siekte, oudword en die dood sal lesers aanraak. “Ek het baie verloor – die kosbaarste. Maar ek het ook geleer om te verduur. Te aanvaar. Tevrede te wees. Anders sou dit ondraaglik wees” (bl. 166).