BOEKE VIR JONGES
KRAAK, Rouxnette Meiring (Tafelberg, R170)
’n Natuurramp bedreig ||Hui !Gaeb (eens Kaapstad) in die jaar 2315. Die virtuele koepel wat oor die stad opgerig is om inwoners teen die giftige see en die gevaarlike buitewêreld te beskerm, is besig om te kraak. Dan verrys ’n eiland uit die see wat verdere bedreiging inhou. Kara en haar kinderhuisvriende word oortuig om noord te trek in ’n poging om die wêreld te red, asook hul ouers wat in ’n diep slaap vasgevang is. ’n Boeiende fantasieverhaal.
LEAH ON THE OFFBEAT, Becky Albertalli (Penguin, R175)
In die opvolg van Love, Simon vertel Leah die groepie vriende se verhaal verder. Hulle is in hul senior jaar op skool en moet kies waar hulle verder gaan studeer. Dit veroorsaak spanning en geswore vriendskappe begin versplinter. Boonop lê die prom nog voor. Ontluikende seksualiteit, rasseverhoudings en sosiale aanvaarding is onderliggende temas van dié vermaaklike verhaal.
WEG, Nerine Ahlers en Alet Steenkamp (Lapa Uitgewers, R170)
Zack is op soek na sy meisie, Niekie. Sy het nie opgedaag vir hul afspraak nie, beantwoord nie haar foon nie en dit lyk asof sy skool bank. Omdat sy voorheen al verdwyn het, is die polisie nie dadelik bekommerd nie. Zack en Niekie se vriende besluit om self na haar te soek. Hulle volg vreemde leidrade wat hulle hopelik na haar ontvoerder sal lei. Spannend en avontuurlik!
AS MENS GELUK KON PROE,
Zelda Bezuidenhout (Lapa Uitgewers, R175) Arnelia is die mollige nuwe meisie in die skool. Sy wil haar lewensverhaal herskryf à la Oprah, maar sy pootjie haarself, letterlik en figuurlik. Haar vriendskap met ’n groep randeiers, soos syself, laat haar besef geluk is om te aanvaar wie sy is. ’n Deernisvolle tienerverhaal vol lewenswyshede.