GOUD OP JOU FEESTAFEL

Fat Bastard Wyne vier vanjaar hul 21ste bestaansjaar en hierdie spesiale chenin blanc is die kroon van die viering. Gebruik dit in dié perskes met soetwyn as heerlike nagereg.

Plaas 200 g (250 ml) suiker en 500 ml Fat Bastard Chenin Blanc in ’n middelslag-pot en bring tot kookpunt. Voeg 5 ml vanieljegeursel by. Halveer 6 geelperskes en plaas in stroop. Verlaag hitte en laat stadig prut tot perskes sag is, maar nie pap nie. Laat afkoel tot koud in stroop. Kook water in ’n pot waarop ’n glasbak stewig pas sonder dat die bodem aan die water raak. Sit 4 eiergele, 125 ml muskadel en 50 g strooisuiker in die glasbak. Plaas op pot en verlaag hitte tot net onder kookpunt. Gebruik elektriese handklitser en klits mengsel vir 5 minute by hoë spoed tot lig en skuimerig. Verwyder bak van hitte en hou aan klits tot mengsel koud is. Plaas perskes in opdienbak en skep skuimsous oor. Brand bruin met kombuisblaasvlam en sit voor.