Gesig van die maand: Grace Elizabeth
Sy is nog net drie jaar in die bedryf, maar die 21-jarige Amerikaner Grace Elizabeth het reeds supermodelstatus. In 2016, kort ná haar eerste draai op die loopplank vir die Italiaanse modehuis Miu Miu, maak sy haar debuut as Victoria’s Secretmodel en word ambassadeur vir hul “jonger” onderklerelyn PINK. Sedertdien is sy nie net ’n gereelde gesig by groot modevertonings van Dolce & Gabbana, Moschino en Chanel nie, maar ook ’n liefling van
Vogue met ’n rits internasionale voorblaaie agter haar naam. Toe, verlede jaar, is sy as gesig van Estée Lauder aangewys. In die advertensieveldtog vir dié gesogte skoonheidshuis se nuwe parfuum vir bruide, Beautiful Belle, is sy die toonbeeld van ’n sprankelende moderne bruid wat nie bang is om te waag nie. Oor haar nuwe rol sê sy: “Die Estée-vrou is alles waarna ek strewe: sy het selfvertroue en skoonheid; sy’s dapper, sterk en ’n entrepreneur.” Nes dié model van die oomblik.