BEWYS VAN ’N VOL LEWE
My voorkop lyk soos ’n kilt, Skotse ruit se moses, met horisontale en vertikale plooie! Om nie te praat van al die lagplooie om my oë nie. Ek bekyk myself in elke spieël en hoop maar net dit was die beligting wat die oorsaak was.
Op 67 word ek ’n navorser en bestudeer ek elke artikel oor velsorg en hoe om plooie te verwyder. Ek eksperimenteer met elke velsorgmonstertjie wat ek in die tydskrifte kry (ja, ook dié in SARIE).
Maar dit lyk of geen roompie wil help nie, en vir die mes en inspuitings is ek vrek bang. (Om te dink dat ek ’n oud-verpleegkundige is.)
Toe onthou ek skielik: Ek het geleef, liefgehad, getrou, kinders grootgemaak en getreur. En al hierdie plooitjies is die bewys van ’n vol lewe! Linda Bosch, Krugersdorp