TROTS SA ONTWERPE OM OOR TE DROOM
Elke argitek se droom is om ’n gebou te kan ontwerp sonder die kniehaltering van begroting of ruimte. In 10 years + 100 projects: Architecture in a Democratic South Africa (Bell-roberts) kan jy SA argitekstudente se droomgeboue sien. Dit het prof. Ora Joubert vyf jaar geneem om die knewel van ’n boek saam te stel uit die werk van studente aan agt universiteite landwyd. Projekte wat die toets van die tyd kan deurstaan, is gekies. ’n Ontwerp wat my opgewonde maak, is die ou meule in Pretoria-wes wat Norbert Koch van die UP sou omskep in ’n parfumerie en glasblaasfasiliteit waar die publiek deel van die proses kan wees. Heelparty studente se ontwerpe fokus op water en watersuiwering, ’n broodnodige lewensbron in droogtegeteisterde Suid-afrika. En al lyk die bestaan van ’n ruimtehawe nou onwaarskynlik, maak Arend Jooste van die UV se ontwerp dit ’n moontlikheid vir die toekoms. Dat SA argitekte se innoverende konsepte met die res van die wêreld kan meeding, is duidelik uit dié boek. Beskikbaar by Exclusive Books of bestel per e-pos by 10years100projects@ gmail.com. Phyllis Green