WAAG MET JOU SOMERHARE
Nuwe jaar, nuwe jy, nuwe hare! ’n Kort parmantige kuif, rosé-pienk hare, ’n perm met strandkartels en ’n natuurlike krullebol is alles in die kol vir 2019
VOORKOMS
’n Stompgesnyde bob of lob was in 2018 supergewild, maar kry nou ’n vars kinkel danksy die “kitten”-kuif. “Dié korter kuif wat effens versnipper is, het ’n 90’s-gevoel en is jonk, vars en effens parmantig. Dit maak jou gesig onmiddellik oop en is een van die maklikste maniere om nuwe lewe in jou haarstyl te blaas,” sê Boyd Meilhon, meesterstilis by die haarsalon Karo Hair in Johannesburg. As jy bang is dat so ’n kuif te veel stilering gaan verg, wees gerus, jou haarstileerder sal jou haartekstuur, hetsy fyn en reguit of krullerig, in ag neem en dan jou stomp haarpunte en kuif só sny dat minimale stilering nodig is.
Wenk!’n Kort kuif met tekstuur beklemtoon jou gesigvorm en lyk daarom beter by ’n lang of ovaalvormige gesig. Vermy dit eerder as jy ’n ronde, vierkantige of hartvormige gesigvorm het.
VERSORGING
Wanneer jy ’n kuif laat sny, neem dit dikwels ’n tydjie vir jou hare om gewoond te raak om so te val. Gebruik ’n bevogtigende sjampoe en opknapper om kroeserigheid te keer. Kam dan net nadat jy jou hare gewas het jou nuwe kuif reguit uit en blaas droog. Mettertyd sal jou kuif vanself mooi droog word. Rond die styl af met ’n glanssproei om fyn haartjies wat opstaan te tem. En moenie van ’n droë sjampoe vergeet nie! Dit werk in ’n kits om olierigheid op jou kuif te absorbeer en tekstuur te skep.
VOORKOMS
Lus om in die nuwe jaar ’n bietjie pret met jou hare te hê? Kleur jou hare pienk! Die laaste paar maande is daar ’n hele rits internasionale en plaaslike bekendes, onder wie Katy Perry, Elle Fanning en Binnelanders- aktrise Pascal Pienaar, wat met tydelike pienk hare spog. Volgens Boyd is die idee dat jou hare net liggies getint word en dat die kleur ná ’n paar wasse heeltemal uitwas. ’n Subtiele perskepienk – dink aan die deursigtige pienk kleur van rosé-wyn – is veral gewild en pas by ’n ligte velkleur. Vir ’n medium tot donker vel lyk ’n kombinasie van pienk en goue skakerings mooi. Dra jou pienk hare dramaties of subtiel: kleur jou hele kop of net die punte vir ’n ombré-effek. Jy kan selfs net pienk ligstrepe laat insit vir ’n sagte balayagevoorkoms.
VERSORGING
Hoewel die kleur veronderstel is om uit te was, wil jy nie hê bv. sonblootstelling moet jou pienk lokke voortydig dof laat lyk nie. Volgens Danica Crous, plaaslike opleier van Moroccanoil, behoort jy dié produkte deel van jou roetine te maak:
Belê in ’n sjampoe en opknapper wat spesifiek ontwikkel is om gekleurde hare te onderhou. Dit keer dat jou haarkutikels oopgaan en vog en kleur daaruit “lek”.
Blootstelling aan die son se Uv-strale kan jou haarkleur laat vervaag omdat dit die bindings tussen die keratien-molekules in jou haarskag breek en jou haarkleur oksideer. Gebruik daagliks ’n haarproduk wat Uv-filters bevat (soos ’n hittebeskermer).
Wend voor jy gaan swem ’n inblyopknapper of masker aan. Dit vorm ’n beskermende lagie oor jou hare en help keer dat jou kleur vinnig vervaag.
Wenk!Kies ’n bevogtigende krulroom of -sproei, pleks van ’n mousse, om jou golwe te definieer, sê Boyd. ’n Mousse-tekstuur is dikwels te hard en kan hare makliker laat breek.
VOORKOMS
Die laaste drie jaar klop ál meer vroue by haarsalonne aan vir ’n perm. Maar moenie dink die eindresultaat is klein, stywe krulle soos dié van die 1980’s nie . . . die moderne perm het eerder sagte golwe met effense tekstuur, byna asof jy pas van die strand af kom. Hoewel die formule van ’n perm- behandeling vandag steeds dieselfde is, het haarstiliste nou meer beheer oor die grootte en voorkoms van die krulle danksy nuwe aanwendingstegnieke. Vir hare met ’n subtiele strandtekstuur sal groter krulle wat sagter en meer vloeiend lyk net op jou haarlengtes geskep word. So ’n perm is ’n goeie idee vir hare wat maklik plat en leweloos lyk omdat dit onmiddellik volume en beweging skep wat twee tot drie maande kan hou. Jou hare sal ook minder stilering nodig hê en jy kan dit minder gereeld laat kleur omdat die deel wat uitgroei nie so sigbaar sal wees nie.
VERSORGING
Ná ’n perm is dit baie belangrik dat jy die skade herstel wat dié chemiese proses aan jou hare aangerig het. ’n Sjampoe, opknapper en masker van goeie gehalte wat vog en voedingstowwe in jou hare terugsit, is ononderhandelbaar, sê Karen Botha, bemarkingsbestuurder van die Brasiliaanse haarsorgreeks INOAR in Suid-afrika. Om jou strandgolwe te stileer, vryf ’n krulproduk in jou klam hare en druk dit met jou vingers opwaarts. Laat dan jou hare vanself droogword.
‘Low poo’Al gehoor van die terme “no poo” of “low poo”? Vroue met baie krullerige hare of ’n afro-haarstyl sukkel dikwels om ’n sjampoe te vind wat hul hare doeltreffend reinig, sonder dat dit hul hare droog, bros en kroeserig laat. Die term “low shampoo” verwys na formules wat geen harde skuimmiddels of nadelige bestanddele bevat nie. Dit werk soos ’n reinigingsopknapper sodat jou hare nie van natuurlike olies gestroop word nie. Spuit ’n bietjie in jou hand en versprei dit deur jou hare. Spoel dit ná drie minute af en volg dit op met ’n inbly-behandeling.
VOORKOMS
Wêreldwyd is daar ’n ontploffing van bruin en swart vroue wat kies om hul natuurlike krullerige haartekstuur te omarm, eerder as om dit voortdurend reguit te laat stryk. Navorsing deur die internasionale marknavorsingsmaatskappy Mintel het reeds in 2015 gewys dat driekwart van etniese Amerikaanse vroue verkies om hul hare natuurlik te dra. Volgens Boyd kry dié tendens ook in Suid-afrika vastrapplek. Hy ervaar toenemend dat etniese vroue by die salon aanklop vir haarsnitte en -behandelings wat hul natuurlike hare komplementeer. “Hare is ’n groot deel van ’n vrou se identiteit en vir baie etniese vroue is dit bevrydend om nou eerder daarop te konsentreer om hul natuurlike hare so goed as moontlik te versorg sodat dit gesond lyk en op die lange duur minder moeite verg om te onderhou.” Soos die neiging groei, word daar ook nuwe innoverende produkte bekend gestel wat spesifiek vir natuurlike etniese hare ontwikkel is. Dit maak dit toegankliker en meer bekostigbaar vir vroue om met hul natuurlike
hare te eksperimenteer.
VERSORGING
Volgens Boyd is die meeste etniese vroue se grootste uitdaging hare wat bros is en maklik breek. Daarby veroorsaak die krullerige tekstuur dat natuurlike olies nie by die haarlengtes kan afbeweeg nie, wat hare droog en kroeserig laat. Natuurlike hare het vog en voedingstowwe nodig wat die haarskag van binne voed, sê Boyd. “Tradisioneel bevat die meerderheid produkte vir etniese hare bestanddele soos gliserien en silikoon om hare blink en meer hanteerbaar te maak. Dié bestanddele gaan lê egter net bo-op die hare. Wees daarom op die uitkyk vir haarsorgprodukte met 100% natuurlike olies soos makadamia-, argan-, jojobaen klapperolie. Die molekules is fyn genoeg om jou haarskag binne te dring en het uitstekende bevogtigende eienskappe.” ’n Inbly-behandeling ná elke haarwas help om hare meer hanteerbaar te maak.