Kyk deur die kreatiewe bril van Freddie, Lady Gaga . . . en kinders

Hulle daag die status quo uit, bly nuuskierig en is gevoelsmense. Hoogs kreatiewes beskou die lewe uit ’n ander hoek en vind telkens die magic. So kan ons almal! DEUR MARGUERITE VAN WYK

Mense wat kreatief is, het die vermoë om die lewe uit ’n ander hoek waar te neem en die alledaagse in blinkerstof te omtower.

Onder dié wat feetjievlokkies oor die mensdom strooi, tel sterre soos Freddie Mercury, destydse hoofsanger van die Britse rockgroep Queen, en die sangeres en aktrise Lady Gaga, wat onlangs haar staal in die rolprent A Star is Born gewys het.

Die lys is lank. Dink ook aan Cher, wat op 70-plus nog optree en in die onlangse opvolgfliek Mamma Mia! Here We Go Again te sien was, ontslapenes soos die Russiese komponis Sergei Rachmaninoff, die Britse skrywer Virginia Woolf, sakeman Walt Disney ...

Plaaslik blom die kleurrykes ook: Nataniël, modeontwerper Marianne

Fassler, komediant en akteur Schalk Bezuidenhout, dramaturg en draaiboekskrywer Christiaan Olwagen en stilis, blogger en koskenner Isabella Niehaus, wie se resepteboek, Duinhuis (Human & Rousseau, R400), nou op die rak is.

Geen baanbreker-prestasies sal plaasvind sonder kreatiwiteit nie. Bogemiddeld #skeppende mense gryp ons verbeelding aan en laat ons droom. Maar is dit net sekere mense beskore?

Isabella glo almal word met kreatiwiteit gebore. “Dis ’n vlammetjie wat gekoester moet word en brand, mits jy aan die regte dinge blootgestel word.” Bella, soos vriende haar noem, meen kreatiwiteit verg vreesloosheid. “Wie het besluit iets is reg of verkeerd? Solank jy oortuig is van jou idee, is dit ‘reg’.”

The Science of Genius,’ n spesiale uitgawe van die tydskrif National Geographic met die fisikus Albert Einstein op die voorblad, het verlede jaar verskyn. Hierin word kreatiwiteit as ’n onderafdeling van genialiteit beskryf. Kenners is dit eens dat hoogs kreatiewe mense die vermoë het om gewone dinge in iets besonders te omtower.

Dit is egter moeilik om kreatiwiteit vas te vat. Einstein sou glo gesê het dit is “’n kombinasie van intelligensie en pret” [ intelligence having fun]. Die Amerikaanse skrywer Ayn Rand weer het gemeen kreatiewes word gemotiveer deur ’n passie om iets te bereik, eerder as om ander te verslaan. En die Amerikaanse politieke aktivis Martin Luther King het gesê toegewyde, skeppende minderhede het meestal gehelp om die wêreld in ’n beter plek te verander.

Carien Loubser, bekroonde regisseur van die Via-reeks JAN, het in ’n Sarie-artikel in Augustus 2018 kreatiwiteit so beskryf: “Toe die ligste, mooiste, perfekste dingetjie waaroor ’n sagte vla-karamel-vanieljesous gedrup en ligpienk hibiskuspoeier gesprinkel is, voor my oopbreek, het ek wintervrugte op ’n veerligte sagobed geproe – dís toe ek weet wat ware kreatiwiteit beteken.” >