Cars.co.za wys topmotors aan
Toyota het vanjaar sy kroon as die Motorhandelsmerk van die Jaar herwin by die Cars.co.za Verbruikersprysaand geborg deur Wesbank. Wenners in 13 kategorieë is op ’n rooitapytgeleentheid, wat deur 350 gaste bygewoon is, by Kyalami in Johannesburg aangewys.
Sedert sy ontstaan in 2016 het #Carsawards ontwikkel in SA se voorste motorprysprogram. Benewens die eksklusiewe borgskap deur Wesbank, die grootste voertuigfinansier in SA, word #Carsawards beskou as die energieke, invloedryke openingsgeleentheid op die motorbedryf se glanskalender. Die hoogtepunte by vanjaar se geleentheid:
Toyota, wat op die eerste prysaand in 2015-’16 as Handelsmerk van die Jaar aangewys is, kon Suzuki net-net uitstof en sodoende Suzuki van ’n driekuns ontneem.
Volkswagen het die meeste kategorieë gewen (4), wat die Duitse motorvervaardiger loshande laat voorloop wat betref getal pryse gewen oor die jare (10 in vier jaar). Mercedes-benz (6) en Suzuki (5) volg in die tweede en derde plek.
Nissan en Honda het vanjaar vir die eerste keer ook ’n trofee by #Carsawards gewen, onderskeidelik vir Kompakte gesinsmotor en Blitsbuks van die Jaar.
In die kategorie Premium-sportnuts kon die Range Rover Velar die Volvo XC90 onttroon. Volvo het hierdie kategorie die vorige drie jaar oorheers. Volvo was egter steeds in die kollig toe die XC60, tans die Wêreldmotor van die Jaar, die eerste plek in die kategorie Weelde-sportnuts van die Jaar gewen het.
Die Volkswagen Amarok 3.0 V6 TDI 4Motion Highline Plus en Toyota Fortuner 2.8 GD-6 4x4 Auto was die enigste finaliste wat hul kategorieë suksesvol van die 2017-’18 #Carsawards kon verdedig. Die Mercedes-benz E-klas het ook sy kategorie suksesvol verdedig, maar met ’n ander weergawe van die model. Suzuki was vir die derde jaar agtereenvolgens die wenner in die kategorie Sakpas voertuig, elke keer met ’n ander voertuig. In 5 van die 13 kategorieë het die beoordelaars se keuse nié gewen nie, omdat die Eienaarstevredenheidspeiling ook by die punte ingereken word. Vanjaar se glansgeleentheid is deur die TV- en radiopersoonlikheid Pearl Modiadie aangebied, met gasoptredes deur Minnie Dlamini, Maps Maponyane en Victor Matfield. DJ Fresh het vir die vermaak gesorg en die oorhandiging is voorafgegaan deur ’n sakeaanbieding deur Wesbank. Altesame 18 handelsmerke is vanjaar by #Carsawards verteenwoordig, met Volkswagen wat in 7 kategorieë – BMW en Ford (4 elk), en Audi, Mercedes-benz en Volvo (3 elk) – benoem is. Porsche en Isuzu het vir die eerste keer die laaste fase van die #Carsawards-program gehaal, met Honda en Range Rover wat weer by die lys van 39 ingesluit is nadat hulle dit nié in 2017-’18 gehaal het nie. Die volledige lys van vanjaar se wenners van die Cars.co.za Verbruikerspryse geborg deur Wesbank is: Suzuki Swift 1.2 GL Sakpas voertuig: Volkswagen Polo 1.0TSI Comfortline Auto Kompakte luikrug: Mercedes-benz A200 AMG-LINE Weelde-luikrug: Nissan Qashqai 1.2 Acenta Auto Kompakte gesinsmotor: Volkswagen Tiguan Allspace 1.4 TSI Trendline Gesinsvoertuig: Volkswagen Arteon 2.0TSI 4Motion R-line Besigheidsedan: Mercedes-benz E220d Avantgarde Weelde-sedan: Volkswagen Amarok 3.0 V6 TDI 4Motion Leefstylvoertuig: Highline Plus Toyota Fortuner 2.8 GD-6 4x4 Auto Hardebaard-sportnuts: Volvo XC60 D5 AWD R-design Weelde-sportnuts: Range Rover Velar D300 R-dynamic SE Premium-sportnuts: Honda Civic Type R Blitsbuks (“Hot Hatch”): Geen toekenning vanjaar nie Verrigtingsmotor:
IMPAK VAN DIE TEVREDENHEIDSPEILING
Volgens Hannes Oosthuizen, verbruikerservaringsbestuurder by Cars.co.za, was een van die oogmerke sedert die ontstaan van die #Carsawards dat verbruikers die kompetisie as ’n koopgids kan gebruik. Daarom word die Eienaarstevredenheidspeiling by die beoordeling ingesluit. Op hierdie manier is dit nie ’n handvol motorjoernaliste en motortydskrifte wat die wenners kies nie. “Omdat 50% van die voertuig se finale punt deur die Eienaarstevredenheidspeiling bepaal word, het ’n voertuig net die kans om te wen as dit ’n goeie voertuig is, én die handelaar puik naverkopediens lewer.”
In vyf kategorieë – Kompakte luikrug ( Volkswagen Polo), Hardebaard-sportnuts (Toyota Fortuner), Kompakte gesinsmotor (Nissan Qashqai), Weelde-luikrug (Mercedes-benz A-klas) en Weelde-sedan (Mercedes-benz E-klas) – was die Eienaarstevredenheidspeiling deurslaggewend vir die uitslag.
HOE WERK DIE PROSES?
Altesame 7 lede van die Cars.co.za-span wys die finaliste aan, en dan kom 13 gasbeoordelaars van verskillende spesialisvelde vir twee dae by Gerotek byeen om al die voertuie in ’n spesifieke klas onder dieselfde omstandighede te toets. In 12 van die kategorieë word die beoordelaars se punte met dié van die Eienaarstevredenheidspeiling gekombineer. Die kategorie Handelsmerk van die Jaar berus egter uitsluitlik op die uitslag van die Eienaarstevredenheidspeiling.