JOU AKSIEPLAN
1 KWEEK DIE GEWOONTE OM DAAGLIKS SONSKERM TE DRA
Tot 90% van eksterne veroudering is as gevolg van die son, sê Sonette. Daarom bly sonskerm die beste wapen teen fyn lyntjies en pigmentasie. “Die sonskade wat jy vroeër in jou lewe opdoen, wys dikwels eers later op jou vel. Deur reeds vroeg in jou lewe in die gewoonte te kom om daagliks ’n sonskerm met ’n SBF van minstens 30 aan jou gesig en nek aan te wend, kan jy die verskyning van pigmentasie, sonvlekke en plooie later in jou lewe verminder.”
2 KIES PRODUKTE WAT VELDEHIDRASIE BEHANDEL
“Baie jonger vroue kla oor fyn lyntjies om hul oë, mond en op hul wange wat al hoe sigbaarder word. Die hoofoorsaak is dikwels ’n gedehidreerde vel weens ’n droë klimaat, stedelike rookmis of die gebruik van lugversorgers en verwarmers. Daarom raai ek vroue in hul twintigs en dertigs aan om altyd bevogtigende produkte met bv. hialuronsuur, gliserien en galambotter te gebruik – selfs al het jy ’n olierige vel. As jou vel optimaal bevog is, sal dit ook minder oortollige sebum vervaardig.”
3 VOEG ANTIOKSIDANTE BY VIR EKSTRA BESKERMING
Stres, te veel alkohol of blootstelling aan besoedeling en blou lig van elektroniese toestelle dra alles by tot die vorming van vrye radikale wat ’n sneller vir veroudering is. ’n Produk met antioksidante, soos vitamien C en E, feruliensuur en druiwepit-ekstrak, moet deel van jou roetine wees. Dit neutraliseer vrye radikale op die boonste laag van jou vel en help dat jou vel homself beter teen eksterne aanslae kan beskerm.