Ontdek jouself IN ’N SA BOS

Jeffrey Rink, kliniese sielkundige van Houtbaai, Kaapstad, wat in hipnose spesialiseer, fasiliteer die afgelope twintig jaar ekosielkundige wegbreke ( retreats), “genesende ervarings in die bos” waar die natuur “terapeuties” ingespan word. “Mense is uit hul gemaksone en voel dalk meer weerloos. Hulle maak makliker teenoor ander ‘oop’ om hul ervarings, ook persoonlik, spontaan te deel,” sê hy.

Dié plat-op-die-aarde, “ongeprosesseerde” ervarings is, nes onverwerkte kos, gesond en gee jou iets om aan te kou lank nadat dit verby is. Die bestemmings is wildplase en groepe is nie groter as agt nie. Saam met ’n plaaslike gids word die plant-, dier- en voëllewe asook medisinale gebruike van plante en bome bestudeer. Deurentyd wys Jeffrey simbole uit: ’n leeu, boom, miershoop. “Alles het ’n storie waaruit ons kan leer.” As hy jou beter ken, soek hy simboliek wat op jou van toepassing is. Jy speel weer soos ’n kind: klim boom, swem in die rivier. Die bos is nie altyd ’n gemaklike plek nie. Dis warm, daar is dorings, soms reën dit. Om egter onder ’n bessieboom te mediteer met die kenmerkende skreeu van ’n visarend op die agtergrond – sonder weerga. Sommige mense het dit reeds tien keer meegemaak.

Gedeeltelik geïnspireer deur Spanje se Camino de Santiago, begelei Jeffrey voorts ’n sewedaagse staptog tussen Vendakrale in Limpopo by die heilige Fundudzi-meer en die Thathe Vondo-woud. Mense word blootgestel aan die inwoners se tradisionele rituele: genesers, die speel van tromme, danse en die vertel van stories. “Dis van die armste mense, maar met ’n rykdom van kennis, wysheid en spiritualiteit.”

Kontak: 021 970 2573, shrink@tiscali.co.za, www.ecopsychologyafrica.com