My asem ruik sleg?
Lek aan die binnekant van jou polsgewrig, wag sowat 2 minute om droog te word en ruik daaraan. Of vra jou beste vriendin vir ’n eerlike mening. Die oorsaak lê in sowat 90% van gevalle by die mond. Dikwels by die biofilm – ’n dun, slymerige laag bakterieë wat aan die mondoppervlakke (tong, tandvleis) kleef. Of aanpaksels van voedselreste, suikers, proteïen en dooie selle. Proteïen word afgebreek en swaelbevattende gasse vorm. Vermy knoffel, uie en sekere soorte kaas en moenie rook nie.
Dis soggens erger omdat jy minder speeksel in jou mond het terwyl jy slaap. Jou mond is dus droër en bakterieë floreer. Gebruik ’n tongskraper, of borsel ook jou tong wanneer jy tande borsel. Gebruik ’n fluoriedtandepasta; borsel jou tande twee minute lank en vervang jou tandeborsel elke drie maande. (’n Elektriese een is beter.) Vlos gereeld en gebruik ’n mondspoelmiddel met chloorheksidien. Pasop vir chroniese mangelontsteking en sinusitis, dit kan ook ’n slegte asem veroorsaak. >