Ek eet gesond, maar is steeds
MARIZA VAN ZYL, geregistreerde dieetkundige van die Paarl, antwoord: Toe ek twintig jaar gelede begin praktiseer het, was prikkelbare dermsindroom (PDS) ’n “snippermandjie-diagnose”. Iemand kla oor hardlywigheid, ongemak, kosintoleransie, ens. en die diagnose is: “Daar is eintlik niks verkeerd nie, eet net meer vesel.” Talle studies dui vandag daarop hoe belangrik ’n “gesonde” dermfunksie is. Daar is die ooglopende simptome soos ongemak en opgeblaasdheid, ja. Maar ’n geneigdheid tot hardlywigheid kan van jou kop (depressie, konsentrasie) tot jou tone (vitamien B12-tekort met simptome soos voete wat brand) ’n uitwerking hê.
Dit het ’n sirkel-effek. Jy’s moontlik hardlywig weens ’n trae skildklier. Maar jou skildklierfunksie sal ook beïnvloed word omdat voedingstowwe weens hardlywigheid nie voldoende opgeneem word nie. Of dalk vermy jy sekere kossoorte om simptome soos opgeblaasdheid te voorkom. ’n Hormoonwanbalans speel ook ’n rol. Só dra die interaksie tussen hormone en jou bioom (organismes in die spysverteringstelsel) byvoorbeeld by tot verskillende maniere waarop mans en vroue se spysverteringstelsel op stres reageer.
Oorsake van hardlywigheid buiten dieet
Trae skildklier
’n “Ongesonde” bioom weens onder meer ’n kolonoskopie, antibiotika of ander medikasie, selfs ’n reis van oos na wes, of andersom
Hormoonwanbalans
Medikasie soos diuretika en sekere antidepressante
Yster- of kalsiumaanvullings
Chroniese spanning