Reis . . . nuut en anders
Vakansie is van die laaste dinge waaraan ons tans dink. Kenners meen weens Covid-19 kan dit vier tot ses maande (selfs langer) duur voor mense weer sal reis. Tog kan jy jou gereed maak en droom oor nuwe en anderste opsies in die maande en jare wat kom. Wa
Maak jy nou reisplanne, dan rek almal se oë. Byna wêreldwyd is dit ’n stryd om oorlewing, met die meeste vlugte erg ingekort of hul vlerke heeltemal geknip.
Op Facebook en YouTube sien ons besige wêreldstede nou grafstil, skielik spookstede. Byna elke kontinent en elke land is geaffekteer; die helfte van die wêreldbevolking ingeperk of deels ingeperk. Die opdrag doodduidelik: Bly by die huis! Van reis is daar nie sprake nie, ook nie vir sake nie. Mense skuil meesal agter toe deure, bang om die coronavirus op te doen, of te versprei.
Maar iewers moet dinge beter gaan en dan kan ons weer begin beplan en droom oor opwindende nuwe reisneigings wat wag – selfs tot in die buitenste ruim.
Zaritha van Wyngaardt se boetiekreisagentskap, The Obvious Choice in Johannesburg, reël wêreldwyd toerervarings vir kliënte volgens individuele behoeftes. Sy is aan die voorpunt van reisneigings en gereeld ’n spreker by internasionale konferensies soos die Nepalese Reis- en Toerismeskou in Katmandoe.
Sy sê tydens ’n webinar van die SA Toerismediensvereniging (SATSA) om Covid-19 te bespreek, het Martin Wiest, uitvoerende hoof van Tourvest Destination Management in Pretoria, gesê dit kan vier tot ses maande duur voor enige besigheid in die reisbedryf weer voortgaan. Die hele wêreld is immers in dieselfde bootjie. Sy reken dit kan selfs nog in 2021 ’n uitwerking op die bedryf hê. Tydens die webinar is gesê die bedryf sal dan probeer herstel, maar dat die aanbod van reise die vraag daarna sal oorskry, wat potensieel prysoorloë tot gevolg kan hê.
Zaritha meen dít kan weer tot gevolg hê dat lugdienste meer sal wil bespaar deur byvoorbeeld passasiers aan te moedig om hul eie peuselhappies en water aan boord te bring. “Reisigers sal waarskynlik ook meer ingestel wees op ‘liefdadigheidsvakansies’, waar hulle armer nasies wil help, en daar sal ’n groter sensitiwiteit jeens herwinbare eetgerei op vliegtuie wees. Juis omdat ons ná die coronavirus al hoe meer in voeling met die aarde en haar behoeftes sal wees.” Dít sluit ook aan by die groot ekobewustheid wat nou heers.
Ironies genoeg is een van die grootste reisneigings vir 2020, en vorentoe, dat mense self in beheer wil wees en selde in reispakkette belangstel wat hulle soos skape rondlei, met alles vooraf vir hulle besluit. (Covid-19 het natuurlik gewys dat daar wel tye is wanneer Moeder Natuur in beheer is en ons moet luister.)
“Dit is nie noodwendig meer vir reisigers belangrik om die Eiffeltoring in Parys of Big Ben in Londen op >
< hul lysie af te merk nie. Hulle soek skouspelagtige ervarings.”
Enigiets van veganis-vriendelike hotelle in Mexiko tot Bhoetan in die Himalaja, soloreise per motorwoonwa, spirituele reise na die Hindoe-kleurfees Holi in Indië, outentieke kulturele ervarings in Pakistan en Afganistan, avontuurreise na die Sokotra-eiland van Jemen (wat weens Somaliese seerowers bykans onbegaanbaar is), eksotiese kosen broodbaktoere na Italië . . . “Dit gaan ook oor die brag-waarde, iets ekstra op jou sosiale CV,” sê sy.
Tegnologie maak dit maklik om al dié opwindende dinge te doen. Volgens die Wêreldtoerisme-organisasie sal daar teen 2030 na raming 1,8 miljard toeriste wees, wat tot ’n tegnologiese revolusie kan lei.
Zaritha sê: “Foto’s van reiservarings op sosiale media soos Facebook en Instagram speel ’n reuse-rol. Voeg daarby die ongelooflike voordeel van navorsing oor verblyf en bestemmings op webtuistes en apps! Ons lees van besienswaardighede, gebruik Google Maps, bestel Uber-huurmotors, en bespreek stadstoere en verblyf aanlyn. Dertig jaar gelede moes ons in reisgidse en biblioteke navorsing doen en was ons aangewese op reisagente en gereëlde toere.’’
Die klik van die muis het ons bevry. Daar is hope nuwe reistendense, waarvan SARIE vier gekies het.