KORTER MET DIE JARE?
Ja! Dis weens faktore wat verband hou met veranderinge in die bene, spiere en ander weefsel in jou lyf. Ouderdomsverwante spierverlies kan reeds in jou dertigs begin. Terwyl ’n sekere mate van “inkrimping” ’n normale deel is van ouer word en waarskynlik nie verband hou met gesondheidsprobleme nie, kan ’n beduidende verlies aan lengte wel daarop dui. Veral van belang is daardie spiere in jou bolyf wat hoofsaaklik verantwoordelik is om jou kiertsregop te hou. Voorts begin jy in jou veertigs meer been verloor as wat gegenereer word, wat uiteindelik tot osteoporose kan lei. Hoewel jou gene ’n rol speel, kan jy met jou leefstyl die impak verminder. Beweeg meer en doen ook weerstandsoefeninge. Eet kosse hoog in vitamien D en kalsium, soos amandels, broccoli en kool.
Bron: theconversation.com