DRIEKUNS VIR FINLAND
Finland is vir die derde keer agtereenvolgens as die gelukkigste land ter wêreld aangewys, aldus die 2020 World Happiness Report.
Vreemd om so ’n verslag tydens ’n globale pandemie uit te reik? Dis juis relevant, sê die samestellers. Hulle meet geluk nie aan ’n glimlag nie, maar “tevredenheid met die lewe en vertroue dat jy in ’n land woon waar inwoners vir mekaar sorg en omgee”. (Die peiling toon 91% van die Finne is tevrede met hul president en 86% vertrou die polisie.) Tydens die krisis het die Finne geglo elkeen sal sy deel doen en was hul reaksie op toesprake deur leiers toewyding. Groot groepe vrywilligers het kos namens ander gekoop en veldtogte begin vir diegene wie se inkomste bedreig is. Ook tops: Denemarke, Switserland, Ysland en Noorweë. Suid-Afrika is 109de uit 156 lande.
Verwerk uit: nytimes.com