Mooier hande
Hulle is blootgestel aan wind, weer en water. Soveel meer noudat ons met die coronavirus ons hande gereeld was. Dis tyd om hulle goed te vertroetel
DROOG EN BESKADIG
Wanneer jy jou hande gereeld was of met handreiniger steriliseer, stroop jy jou vel van vog. Mettertyd raak jou hande droog, grof en selfs jeukerig. Dit is omdat die seep en die alkohol in handreinigingsprodukte wat onsuiwerhede verwyder, jou vel se boonste lipiedlaag beskadig, sê Emmy Stoltz, hoof van spa’s vir die plaaslike spa-en-lyfsorgreeks MatsiMela. Fyn skeurtjies ontstaan dan in jou vel waar kieme kan binnedring en inflammasie veroorsaak.
VERSORG SÓ: Dis baie belangrik om elke keer nadat jy jou hande gewas het, ’n goeie handeroom te gebruik. Kies ’n produk met bestanddele soos hialuronsuur, gliserien, galambotter en plantolies wat verlore vog aanvul asook die velwand herstel sodat vog beter ingeseël word. Gebruik ook handwasprodukte wat voedende en strelende bestanddele soos aloe vera of vitamien E bevat. As jou hande buitengewoon droog is, gaan vir ’n salonbehandeling wat spesifiek ontwikkel is om beskadigde hande te vertroetel.