SO SÊ ANNERLE BARNARD OP SARIE.COM
Dís waarom sy die donker temas van kinderhandel, dwelms en kinderpornografie in haar jeugverhale, Sindikaat en Sweepslag (Tafelberg, R195 elk), takel.
Daar was die laaste paar jaar gereeld nuusberigte oor kinderhandel, dwelms en die seksuele misbruik en verfilming van minderjariges in die Vrystaat en die res van Suid-Afrika. Menseregtekenners reken dat bewusmaking tot verminderde blootstelling lei. Volgens die internasionale slawerny-indeks (Global Slavery Index) is ongeveer 155 000 mense in Suid-Afrika in die een of ander vorm van moderne mensehandel vasgevang en bestaan die gevaar dat tot 54% van die bevolking in hierdie strik kan trap. Dit is dus ’n baie relevante tema – net soos die smokkelhandel in bedreigde spesies (Sindikaat). Die jeug is nie dom nie en jy kan hulle beslis nie ’n rat voor die oë draai nie. Vanweë die tegnologie en ons veranderende hedendaagse samelewing is hulle baie meer blootgestel as ’n paar dekades gelede. In internasionale jeugfiksie is géén tema taboe nie. Fanatiese tienerlesers lees dikwels vanaf vyftien volwasse fiksie, wat enige tema aanroer. ’n Onderwyseres het eendag vir my gesê een van haar leerlinge het Afrikaanse fiksie beskryf as net nóg ’n Afrikaanse cliché. Dis belangrik dat die jeug graag boeke in hul moedertaal sal wíl lees en daar is regtig uitmuntende, moderne Afrikaanse fiksie beskikbaar.