Kleur as medisyne
DEUR VAN LINKS
Só word wit in baie Westerse lande gebruik om onskuld en reinheid te verteenwoordig; in baie Oosterse lande is dit ’n simbool van rou. “Kleur is ’n universele taal. Ons vertaal dit dalk nie almal dieselfde nie, maar dit bly steeds ’n kommunikasiemiddel,” sê Lien.
Op ’n basiese vlak is kleur soos medisyne as jy dit spontaan en intuïtief kies, volgens stylghoeroe Jackie Burger. Jy voel vandag jy wil net by die huis sit, dis koeler met grys wolke wat laag hang. En jy is lus vir grys. Dit mimiek op ’n onbewustelike vlak wat jy soek, ’n gevoel van knus wees. In die lente speel groen en geel weer ’n rol. “Ek moet ’n paar goed in my kas hê. Nie ’n rooi hemp nie, wel ’n ou rooi trui. Die gryse is meer in winterteksture, witte in linne en katoen. Ek is lief vir ’n koue blou. Dit spreek tot mý,” sê sy.
Elkeen van ons moet dus leer wat ons kleur- en tekstuurtaal, ons styltaal is. Dáár begin. Word jy gestroop tot wie jy in jou essensie is, verkies jy dalk geel of blou bo wat ook al die modekleur is. Daar is ook ’n evolusie, met die jare kan jy meer eksperimenteel, speels raak. Soos Jackie sê: “Jy moet heeltyd jou hand op jou stylboesem hou. Wie is ek vandag? Ek hoop die tyd van afsondering het ons minder afhanklik van die buitewêreld gemaak – die meeste mense kry hul fix van buite af in plaas van binne.”
Die sosiale media het ’n imageekonomie geskep. Als gaan deur daardie filter en jy wys dalk die wêreld ’n beeld wat nie eg is nie. Voeg dáárby die voorskriftelikheid van die mode. “Mode gee ons kans om kreatief te wees, onsself uit te druk. Maar as dit ’n trapmeul word waarop jy hardloop, verloor jy jouself. Jy trek nie vir jouself aan nie, maar vir goedkeuring, om in te pas.
“Ons lewe nou eenmaal nie in isolasie nie, maar is heeltyd in voeling met die buitewêreld. Die kraai in ons sal altyd sê: ‘O, dis mooi, ek wil dit hê.’ Hou egter jou eie filters gesond wat dinge uit die buitewêreld filtreer. Dan kan jy bewustelik kreatief begin speel. Die impulse uit die wêreld daarbuite gebruik, maar self besluit wat ’n modetendens of -kleur vir jou siel doen.”
’n Tendens van ons tyd is om te wil afskaal, hand in eie boesem te steek. Dis nou ’n goeie tyd om te besluit: Dís wie ek is. Dís die kleur, tekstuur, mode wat my gelukkig maak. Die vere maak die voël, lui die gesegde. “Maar kyk jy regtig na mense met styl, selfs al dra hulle ’n oorpak, hulle dra wat hulle gelukkig maak en dís wat hulle uitstraal,” reken Jackie.
Lien vul aan: Maak seker jy weet hoekom jy sekere waardes en betekenisse aan kleur heg. Vorm jou eie mening. Die enigste manier wat jy dit kan doen, is om bewus te raak van hoe jou lyf en gemoed op verskillende kleure reageer.
So waar begin jy om meer kleur by jou lewe te voeg? Lien: “Die vertrek waarvan jy die meeste hou, die meeste tyd deurbring of werk, moet die kleur van jou hart bevat. Daardie een kleur wat jou kinderlik gelukkig maak. Of jy nou ’n muur verf, ’n skildery ophang,