LIPSTIFFIE IN DIE GESKIEDENIS
Reeds in antieke tye het vroue instinktief geweet daar lê krag in rooi lippe. Hulle het selfs nie geskroom nie om ’n kombinasie van giftige bestanddele te gebruik vir ’n bietjie kleur op hul lippe. Tydens die Tweede Wêreldoorlog het vroue wat in fabrieke moes werk, rooi lipstiffie gekry om hul gemoed te lig en produktiwiteit te verhoog. Die dra van lipstiffie is gesien as ’n patriotiese plig. Ná die 9/11-terreuraanvalle het lipstiffieverkope in Amerika die hoogte in geskiet. Dié verskynsel, ook tydens die Groot Depressie van die 1930’s gesien, is die lipstiffie-effek gedoop. Kortom: In ekonomiese krisistye daal die verkope van byna alle verbruikersgoedere, maar dié van skoonheidsprodukte styg.
Oranje lipstiffie in alle skakerings – dink perske, koraal en bloedlemoen – warm onmiddellik jou gesig op en laat jou vars en opgewek lyk. “Daarom is baie van my ouer kliënte lief vir dié skakering,” sê Alicia. “Dit laat hulle mooi gesond lyk.” Onthou om saam met jou oranje lippe die res van jou grimering in dieselfde kleurfamilie te hou met skakerings van perske, goud of brons op jou wange en oë.