Leesdinge
want leef het hoogstens eksperimenteel en gerieflik blaamverskuiwend geword uit Francis Grobler se gedig “statistiek van leef” in haar bundel nagblind (Naledi, R240)
Peacocks & Picathartes: Reflections on Africa’s Birdlife
Rupert Watson (Struik Nature, R220)
Watson, gebore in Engeland, het meer as 40 jaar in Kenia gewoon. Sy werk het hom reg oor Afrika geneem. So kon hy sy fassinasie met voëls vlerke gee. In sy boeiende boek fokus hy op die diverse geveerdes eie aan dié kontinent. Hy deel sy reise en ekspedisies waarop hy spesifieke voëls gesien het. Al is die boek gepak met feite oor voëls en vermeng met geskiedkundige insigte van ander bekende voëlkenners, onder wie Austin Roberts, lees dit soos ’n reisverhaal. Interessante brokkies uit die boek: In 1913 was volstruisvere in Suid-Afrika die vierde grootste uitvoerproduk, naas goud, diamante en wol. Die krag waarmee ’n sekretarisvoël op sy prooi trap, is gelykstaande aan ’n hou van ’n 20 kg-hamer. Die neushoringvoëlwyfie messel haar toe in die nes tydens broeityd, met net ’n gleuf waardeur die mannetjie haar vir ses weke of langer voer. Dié juweel van ’n boek is nie net vir voëlkykers nie!
– Phyllis Green