Aktrise Jane de Wet: ‘My oë het gesién, gepráát’
“My naam is Jane de Wet. Dis ek wat julle so aanmekaar teister met oproepe en e-posse. Aangesien dit op dowe ore val: Hier is ek nou persoonlik met my CV en portefeulje. Ek dink ek sal ’n aanwins wees . . .” Sulke chutzpah moet beloon word en APM, ’n agentskap vir akteurs en stemkunstenaars in Kaapstad, verteenwoordig Jane sedertdien. Rolle het gevolg in onder meer The Girl from St. Agnes, Moffie en Griekwastad, waarvoor sy by die Silwerskermfees ’n toekenning as mees belowende jong talent gekry het. “Om só lief vir iets te wees dat niks jou afskrik nie, is bietjie vreesaanjaend. Toneelspel is my roeping, ek wéét dit. Dus pak ek enige rol, ongeag hoe klein of groot, met dieselfde toewyding en ywer aan. Ek glo elke verlies, seer, uitdaging en lewenservaring maak my ’n beter akteur en wil dus nooit bang wees vir die lewe nie. Oor 50 jaar wil ek kan terugkyk en sê: ‘My oë het gesién, maar hulle het ook gepráát.’”