Onvergeetlike 8
Dis ’n tyd van persoonlike styl. Verby is die dae wat ons ons klerekaste vul met onnodige items. Met hierdie 8 wen jy heelpad – vandag en môre
Die stewel
Tendense kom en gaan, maar luiperdvelmotief is hier om te bly; dit is soos swart en wit in jou kas, ’n staatmaker. Die stewel se trefkrag is in die detail: twee ritssluiters en verskillende diervelpatrone. Al is dit van kunsleer, sal jy steeds baie dra daaruit kry as jy mooi daarna kyk. Hou die sole dop en laat dit hersool voor jy dit afloop.
Die wit bloes
’n Klassieke wenner waarmee jy nooit ’n fout kan maak nie. As jy ’n nuwe toevoeging tot jou kas wil maak, wees op die uitkyk vir interessante detail. Die raglanmou met plooie by die boordjies verleen ’n sagtheid aan hierdie bloes, met die skuins knope as detail wat ook aandag trek. Die growwer geweefde katoen-enlinnemengsel gee die bloes ’n wonderlike tekstuur.
Die modebedryf is die tweede grootste verbruiker van water ter wêreld, en katoen een van die dorsste materiale. Maak dus ’n volhoubare modekeuse wanneer jy ’n nuwe item aankoop. Hierdie tydlose rok is van Tencel™ Lyocell, wat hoofsaaklik van volhoubare hout gemaak is. Dis ’n hernubare materiaal wat baie min of geen water gebruik nie.
Die oorbel
Die helder kleure lig jou gemoed. Veral noudat niemand jou rooi lippe onder jou masker kan sien nie, is dié paar maroen oorbelle jou nuwe lipstiffie en treffende glimlag. Die bonkigheid van dié trots SA oorbelle gee oemf aan jou voorkoms.
Koop minder, kies beter, laat dit hou Britse modeontwerper Vivienne Westwood
Die belt
Ek het nog altyd aan bykomstighede gedink as die uitroepteken van ’n vrou se uitrusting Amerikaanse ontwerper Michael Kors
Vir lank was belde die weeskind van bykomstighede, maar in 2020 is dit die sleutel tot foutlose, modieuse styl. Vergeet van eenvoud kraai koning, die geheim is dat mense twee keer sal kyk. ’n Belt met ’n diervelmotief sal jou beslis nie in die steek laat nie.
Die handsak
Die een item waarin die meeste vroue byna hul lewe saamdra. Met sy interessante vorm en kleur asook kettingdetail is hierdie ’n handsak met houding. En een wat jy seisoen ná seisoen kan gebruik.
UIT DIE ABOVE
AND BELOW-REEKS (NR. 19) ink op doek, 30 x 30 cm Kunstenaar: Paula Dubois
Die trui
Die kabeltrui is klassiek en dié weergawe met sy pofmoue en valdetail gaan jou gunsteling word. Dit werk perfek saam met die eenvoudigste broek of romp. Die één uitsonderlike item wat jou ’n wen-uitrusting gee.
Die serp
Serpe was nog altyd spesiaal, des te meer vanjaar. Jy kan dit ook om jou gesig vou as ’n masker. Jy wil hê dit moet lig en luuks voel teen jou vel en dis presies wat hierdie serp van 100% sy doen.
Spesiale dank aan Paula Dubois vir haar kunswerke as agtergrond. Vir meer inligting kontak paulatdubois@gmail.com of volg haar by @pauladubois_ op Instagram