Amanda se koesterplek
Kom kuier saam met ons by die bekende ontwerper en voorloper in volhoubare dekor Amanda du Plessis. Hier werk en woon sy saam met haar gesin in ’n huis vol lag en lewe en spesiale goed
Amanda du Plessis is die eienaar van Evolution Product (evolutionproduct.co.za), ’n reeks dekoritems in haar unieke en aardse styl. Inspirasie put sy uit haar gesin en familie asook die natuur en ons ryke geskiedenis. Haar huis in Parkview, Johannesburg, laat jou welkom en geborge voel. Dis gevul met goed wat vir haar mooi en kosbaar is.
Sy vertel dat sy grootgeword het in ’n pragtige ou grasdakhuis in Pretoria. As kind was dit haar taak om haar geliefde en kreatiewe ma se laslappies in die allermooiste kleure te sorteer. En hier is haar lewenslange liefde vir lap gebore. Eers het sy klere ontwerp onder die etikette Oaktree, Define en Excursion, totdat sy Evolution Product begin het.
Vanjaar is haar dekoronderneming tien jaar oud. Dit was van die begin af ’n groot sukses en sy het al in wêreldstede soos New York en Singapoer uitgestal, en voer uit na verskeie lande. Haar missie was nog altyd om dekor-items te skep wat volhoubaar is en ’n unieke storie vertel. Die Evolutionspan werk al die afgelope vyf jaar saam met ’n Nederlandse sake ontwikkelings organisasie( C B I) omte verseker hul produkte voldoen aan streng vereistes vir volhoubaarheid. Sy werk met plaaslike linne en gebruik sover moontlik organiese produkte en prosesse – waarlik dekor met ’n gewete.
Haar huis is haar skulp, ’n plek waar kinders en diere welkom is. En haar tuin haar toevlug, uitgelê met die hulp van Tim Conradie van The Gardeners. Inheemse plantname soos ploegbrekers, bloedlelies, kooigoed en aasblomme glip van haar tong af en groei welig in haar beddings.
Al het die pandemie haar onderneming op sy oor kom draai, het sy tog inspirasie en nuwe lewe ontdek. So vlieg die gesigmaskers wat sy van haar oorskietlap maak van die rakke af. Die ekstra tyd saam met haar man, Rudolph, en twee tienerseuns, Wian en Malan, is vir haar kosbaar en het haar kans gegee om nog meer kreatief te dink en te beplan.
BL .104 GUNSTELING VERTREK
Amanda beskryf haar dubbelvolume-leefvertrek as die plek waar sy en haar gesin die gelukkigste tye saam deurbring. Sy het met ’n stukkie lap afgesit verfwinkel toe sodat hulle die presiese donker grysgroen skakering vir haar muurverf kon meng. Die rusbank is van Casamento (casamento.co.za) en volgens haar spesifikasies ontwerp. Die twee woudgroen stoele het sy by ’n tweedehandswinkel in Melville gekoop. Sy is mal oor die tekstuur van haar seegrasmat.
ONDER OU KALANT
Amanda wou van altyd af ’n ou leerstoel in haar huis hê. Toe sy dit by Ossewa Antiques (ossewaantiques.co.za) in Melville raakloop, het sy dit dadelik gekoop. Die een armleuning is al verweer, maar dis vir haar mooi en reg om te sien wat binne-in so ’n ou stoel aangaan. Die kussingmotief is ’n aasblom, inspirasie uit haar tuin.
BL. 105 HEEL REGS DIE VRUG VAN ARBEID
’n Stapel lappe wag om in ’n besonderse dekoritem omtower te word. Jou hande jeuk as jy al die verskillende kleure, ontwerpe en teksture in haar ateljee sien.
BOTTELTJIE BLOU
Vir ’n besige huishouding is kalm blou die regte keuse vir die hoofslaapkamer. Die fokuspunt is een van die muurbehangsels wat Amanda so nege jaar gelede vir Weylandts ontwikkel het. Dit herhaal die kleure van die plante en blomme in die kamer en die denimblou bed belowe ’n soete nagrus.
LINKS KUNSKAS
Hierdie nuttige laaikas het Amanda ook by Ossewa Antiques in Melville gekoop. Sy is mal oor al die pakplek wat dit bied, en dis terselfdertyd die perfekte uitstalplek vir haar mooigoed. Natuurlik is daar plante met interessante vorms en glasware om kontras te skep. Die ry vlaggies met gesigte op het sy ’n paar jaar gelede by die Design Indaba by ’n ontluikende kunstenaar gekoop. Sy kan nie haar naam onthou nie, maar wens sy kon haar laat weet hoeveel vreugde hierde gesigte haar elke dag verskaf.
REGS INSPIRASIE
Amanda se tuisateljee wemel van foto’s, prente en knipsels.
ONDER TEKSTUUR EN VORM
Die huis is gevul met Amanda se unieke produkte, soos hierdie kussings met ’n silhoeët van verskillende varings en blare en borduurwerk in die ryk kleure van ’n woud.
ONDER REGS UITSTALPLEK
Die glaskas met ’n industriële voorkoms is die bêreplek vir Amanda se mooi versameling lappe.