Klein Kook & Geniet, S.J.A. de Villiers en Eunice van der Berg (Human & Rousseau, R280)

My eksemplaar van Kook & Geniet val al uitmekaar van gebruik, maar ek is te sentimenteel om dit te vervang. Dit was een van die eerste resepteboeke wat ek by my ma gekry het. Vreemd om te dink dié boek het al die eerste keer in 1951 verskyn.

Nou is daar ’n kleinsus van die oorspronklike kookboek, spesiaal vir kinders wat wil leer kook. Dis ’n visuele fees, want dis ten volle geïllustreer met kleurfoto’s.

Kinders word bekend geste laan kombuisgereedskap en hoe om dit te gebruik. Hulle leer hoe om ’n resep te lees en te volg, asook wat die verskillende kookterme beteken. Elke resep word stap vir stap met kleurfoto’s verduidelik. Die resepte is maklik om te volg en so gekies dat dit in die smaak van ’n jong gehoor sal val. Hier sal hulle leer dat hamburgers nie net uit die kombuis van kitskos restaurante kom nie, maar dat hulle dit self kan maak!

’n Lieflike geskenk wat jou kinders se liefde vir kook sal help ontwikkel. Phyllis Green