Reggie & Me, James Hendry (Macmillan, R290)
Lanklaas het ek soveel waardering gehad vir ’n skrywer se vaardigheid en sekerlik sy vermoë om die verlede te laat herleef. Die boek oor Hamish Charles Sutherland Fraser se lewe tussen 1976 en 1994 in Johannesburg was ’n verrassing, en ook ’n openbaring. Aanvanklik het ek half sinies begin lees, want die flapteks het my nie gelok nie. Ek het in die 1970’s in Gauteng gewoon en baie van die gebeure het danksy die onbeholpe hoofkarakter en die humoristiesse vertellings my amper ’n knop in die keel gegee.
Deur die eksentrieke Hamish se ervarings op skool – van sy eerste jaar tot die matriekdans – en sy pogings om aan sport deel te neem, sy vriendskap met die meisie Reggie, vrae wat hy vra en sy koordeelname, kry jy ’n blik op die lewe in ’n Johannesburgse voorstad in ’n tyd van politieke onrus. Soms lag jy hardop en soms snik jy. Trouens, jy wil nie eintlik glo die boek is fiksie nie, want die bekendheid skemer deur.
Hendry se beskrywings, karakteruitbeelding sen ook sy woordkeuses is onverbeterlik. Die boek sal ek weer lees. Alida Vos