Rover laat mense glimlag

Twee kreatiewe sussies, tyd tot hul beskikking en ’n hond wat “meer mens as hond” is . . . Dit kon eintlik nie anders nie, Rover moes sy eie Instagramblad kry. En so is @rover_the_ airdale geskep, met honde-volgelinge van oor die wêreld heen, van China tot Amerika.

Aan foto’s van hul driejarige airedale-terriër het Jana en Karla Visser van Stellenbosch geen tekort nie. En Rover is altyd bereid om te poseer. Soos Jana, wat sy teks skryf, sê: “Hy’s dol op die kamera. En daai gesig . . . Dis sy superpower.”

Rover se lyftaal sê wat mense voel, meen Karla. “Deur hom kon ons ons frustrasies tydens lockdown op ’n humoristiese manier uitbeeld en mense laat glimlag. Hy het soveel persoonlikheid, hy sit selfs op sy eie stoel aan tafel – hy mag wel nie eet aan tafel nie!”

Dit was vir hulle lekker om só koppe bymekaar te kon sit. Karla studeer as sjef aan die ICA op Stellenbosch. En Jana, ’n tekstielkunstenaar, het huis toe gekom nadat onderhoude vir haar meestersgraad aan die LUCA-kunsskool in Gent, België, weens die pandemie uitgestel is. Die blad sal voortleef, al gaan sy terug. “Dis ’n stukkie humor in die dag – selfs van ons vriende se ma’s volg hom.” En dis die ideale teenmiddel as jy huis toe verlang.