Beste van SARIE.com
’n Duo deel 7 lesse, dié 7 plekke is gewilde bestemmings vir pasgetroudes, maar sommer ook vir elkeen wat die grendelroes wil afskud en só lyk ’n unicorn-latte. Kom kuier in ons aanlyn wêreld
7 WITTEBROOD-IDEES IN SUID-AFRIKA
Die woord “wittebrood” is genoeg om idilliese beelde van wit strande, turkoois water, eksotiese boslandskappe, dromerige sonsondergange, en ultra-luukse verblyf in jou geestesoog op te roep. Maar in 2020 is die wêreld en die troubedryf tot stilstand gedwing. Daar is ook nog geen sekerheid wanneer Suid-Afrikaners weer na die buiteland kan reis nie. Juis daaroor is dit dalk tyd om ’n kopskuif oor wittebroodbestemmings te maak. Plaaslik, trots Suid-Afrikaans is jou antwoord.
SARIE het by LekkeSlaap gaan inloer om ’n lys van Suid-Afrika se gunsteling-wittebroodbestemmings saam te stel.
1. WATERBERG
Hierdie besonderse area in Limpopo, wat die skrywer en digter Eugène Marais geïnspireer het, se berglandskap en ryk bosveldplantegroei is genoeg om jou van die wêreld daarbuite te laat vergeet. Spandeer jou dae in die veld – van roetes teen bergpieke uit, tot die kans om in natuurlike watergate te swem, wildritte tot ’n glasie Amarula in ’n oneindigheidswembad met ’n asemrowende uitsig.
2. TUINROETE
Die roete van 300 km aan die suidkus is perfek vir ’n roadtrip. Tsitsikamma, Plettenbergbaai, Knysna, Nature’s Valley, en Mosselbaai is enkele van die mooie bestemmings wat romantiese opsies bied
vir bosliefhebbers én paartjies wat begeer om dag en nag op die strand te wees.
3. KAAPSE BERGE
Die Kaap bied veel meer as wynlandgoedere en see. Die Langeberglandskap van berge en fynbos is perfek vir paartjies wat vir ’n paar dae van die wêreld wil ontsnap.
4. MAGOEBASKLOOF
Tussen Tzaneen en Polokwane lê nog een van Limpopo se versteekte paradyse: Magoebaskloof. Dié subtropiese lushof is ideaal vir paartjies wat aktief is, met stapen fietsryroetes deur natuurlike woude, langs bergstrome en riviere.
5. KAAPSTAD
Die toweragtige miswolke oor
Tafelberg, romantiese sonsondergange by Kampsbaai, mooi strande en luukse restaurante in die Waterfront lok toeriste van oral. Hier kan jy die meeste van jou wittebrood maak met besoeke aan die nabygeleë wynlande, dae op die strand, staproetes om Tafelberg en oggendkoffie by van ons land se voorste koffiebrouers.
6. KAROO
Lae koppies, hoë berge en plat vlaktes word bedek deur bossieagtige plante om een van ons land se geliefdste streke te vorm: die Karoo. Boonop is die Karoo ook ver van die stad se gejaag.
7. BOSVELD
Gaan slaap met die geroep van die reuseooruil in jou ore, kyk oor ’n glas hoe die olifante in die water baljaar en gaan op ’n wildsrit om die Groot Vyf te aanskou. Boonop is die bosveld se weer reg deur die jaar matig – ideaal vir ’n wittebrood in die somer óf in die winter! – Elmari de Vos
Lees die volledige artikel op SARIE.com