HIER’S DAAI TREFFERS WEER
Nostalgie is gróót, en ook die vermaaklikheidsbedryf omarm dié tendens met ou reekse en flieks wat herleef. Die jongste is die gewilde 1980’s-sitkom Who’s the Boss (foto), met Tony Danza en Alyssa Milano wat reeds ingestem het om hul ikoniese rolle as enkelouer Tony en sy dogter Samantha te hervat. Die vervaardigers hoop ook om Judith Light (Angela) en Danny Pintauro (Jonathan) te betrek. Ook in die vooruitsig is ’n opvolgfliek van die 1987-treffer Dirty Dancing. Jennifer Grey, wat die harte as Baby gesteel het, is die uitvoerende vervaardiger en sal die hoofrol vertolk. Haar medester Patrick Swayze is in 2009 aan kanker oorlede. Opnames vir ’n Friends-reünie is weens die pandemie tot 2021 uitgestel.