WITSJOKOLADE & ROOS
Witsjokolade is vir my die vroulike sjokolade van die fyngebak-kombuis. Tegnies is dit nie sjokolade nie omdat dit geen kakao (die sjokolade-deel van die boon) bevat nie, maar net kakaobotter (die natuurlike vet). Koop altyd witsjokolade van goeie gehalte as jy daarmee bak of kook. Vra vir couverturesjokolade as jy onseker is. Voeg rooswater by en dis die toppunt van verleiding.
Macaroons is moeilik om te maak, maar as jy hierdie resep stap vir stap volg en geen kortpaaie vat nie, sal jy sukses hê. Jy moet al die bestanddele weeg om seker te maak die hoeveelhede is baie akkuraat.
genoeg vir 24 macaroons opmekaar geplak
190 g versiersuiker
190 g amandelmeel
2 bakkies met 70 g eierwit elk, by kamertemperatuur
10 ml rooswater pienk jel-voedselkleursel (of die kleur van jou keuse, kyk by bakwinkels)
55 g water
190 g strooisuiker
100 ml room
200 g witsjokolade, baie fyn gekap
Verhit oond tot 140 C en voer twee bakplate met bakpapier uit.
Sif versiersuiker en amandelmeel in aparte bakke. Sit dan versiersuiker en meel in ’n voedselverwerker en meng goed. Meng 1 bakkie (70 g) eierwit met die meelmengsel. Voeg rooswater en ’n paar druppels voedselkleursel by. Meng tot gladde smeer vorm en hou eenkant. Plaas die ander bakkie se eierwit in die bak van ’n elektriese menger en klits by medium spoed tot sagte punte vorm. Skakel menger af en kook ’n suikerstroop: Meng water en strooisuiker in middelslagpot en roer oor lae hitte tot suiker heeltemal opgelos het. Verhoog hitte en bring tot kookpunt. Kook tot ’n suikertermometer 118 C wys. Skakel menger aan op volspoed en giet warm stroop in ’n dun straaltjie by die geklitste eierwit. Klits meringue tot dik en afgekoel en vou in drie dele by die amandelsmeer in. Skep mengsel in ’n spuitsak met ’n skerprandtuit van 1 cm. Spuit dan sirkels van so 2 cm groot met meringue op die bakpapier. Laat val die bakplate met die meringue van ’n hoogte van sowat 15 cm op jou werkvlak – doen dit drie keer en laat staan sowat 30 minute. Bak vir 20 minute en moenie die oond vroeër oopmaak nie, want die macaroons kan platval. Haal uit oond en laat afkoel voor jy dit van die bakpapier verwyder. Vulsel: Bring room tot kookpunt. Gooi oor sjokolade in skoon bak en roer weg van hitte tot gladde mengsel. Laat afkoel tot smeerbaar en skep ’n bietjie sjokolade op helfte van die macaroons. Plaas tweede helfte boop. Sit voor.