Aspersies met ’n bottersous

In ’n Franse kombuis staan hierdie botter-en-wynsous bekend as ’n beurre blanc. Direk vertaal, is dit “wit botter”. Dis baie lekker.

genoeg vir 6

400 g aspersies

60 ml witwyn

60 ml witwynasyn

½ klein ui, fyngekap

80 ml dubbeldik room

3 ml sout

230 g (250 ml) botter by kamertemperatuur, in blokkies gesny

Bring groot pot met water tot kookpunt en dompel aspersies in kookwater vir 5 minute. Skep aspersies uit water en hou eenkant. Moenie die water weggooi nie, maar laat dit eenkant prut terwyl jy die sous maak: Plaas wyn, witwynasyn, uie en room in middelslagpot en kook tot vloeistof met helfte weggekook het. Voeg sout by. Stel plaat op laagste hitte en klits botterblokkies bietjie vir bietjie by asynmengsel tot gladde sous vorm. Moenie dat sous kook nie, anders gaan dit skif. Gooi aspersies terug in pot met kookwater vir ’n paar sekondes om weer warm te word. Dreineer en plaas op dienbord. Gooi sous oor en sit voor.