GUNSTELINGPLEK

Die diep stoep is beskut teen die elemente en het ’n uitsig oor die veld en landerye. Dis gemeubileer met twee antieke morrisstoele en grasmatte wat hulle langs die pad by Bredasdorp gekoop het. Die borde teen die muur is geglasuurde terracotta en is eintlik drupborde vir potplante. Die klein sytafel is ’n ou koperskinkbord waarvoor Jan-Georg metaalpote gemaak het en die glasballe het hulle op ’n veiling gekoop. Die groot plante en die takbokvarings skep ’n koel atmosfeer.