Soete slaap vir mooiste vel
Nes ’n goeie nagrus nodig is vir jou gesondheid en gemoed, hou dit ook vele voordele vir jou vel in. Só kry jy die meeste uit jou skoonheidslapie
OOns weet skoonheid kom nie in ’n mooimaakbottel nie . . . maar dit mag dalk net in ’n goeie nag se rus wees. Wanneer jy saans jou kop neerlê, is dit nie net jou lyf en brein wat begin “huis” skoonmaak nie, maar ook jou vel. Gedurende die dag beskerm jou vel homself teen UVblootstelling en vry radikale weens eksterne faktore. Sodra die son sak, skakel jou vel oor na ’n herstelfunksie waartydens die skade van die dag reggestel word en prosesse soos selvernuwing, kollageenvervaardiging en bloedsirkulasie na jou vel ’n hupstoot kry, verduidelik Yolandé Swanepoel, akademiese hoof van die Isa Carstens Akademie. Maar kruip jy te laat onder die komberse in, kry jou vel nooit die kans om die voordele van dié waardevolle hersteltyd te geniet nie.
Sodra die son sak, skakel jou vel oor na ’n herstelfunksie waartydens die skade van die dag reggestel word Yolandé Swanepoel, akademiese hoof van die Isa Carstens Akademie
JOU VEL SE HORLOSIE
Unine van Rooyen, plaaslike opleier van Dermalogica, verduidelik jou vel volg jou liggaam se natuurlike sirkadiese ritme, of interne horlosie. “Met ’n gesonde sirkadiese ritme begin jou vel al omstreeks negeuur saans melatonien, die hormoon wat jou slaperig laat voel, vrystel.
Kruip jy dan in, bereik jou vel sowat twee uur later sy piekhersteltyd.” Navorsing wys dat die vervaardiging van nuwe velselle in hierdie tyd tot drie keer vinniger as deur die dag is. Kollageenvervaardiging is ook vinniger en verhoogde bloedsirkulasie sorg dat meer voedingstowwe jou vel bereik en afvalstowwe weggevoer word. Deur dikwels minder as ses uur ’n nag te slaap, ontneem jy jou vel die kans om te normaliseer en te detoks. Dit lei tot inflammasie, pofferigheid en donker kringe om jou oë, vroeë lyntjies, plooie en ’n vel wat vaal lyk. Dis egter nie net die aantal ure wat jy slaap wat belangrik is nie, maar ook die gehalte van jou slaap.