NAGWERKERS

Gelukkig kan jy met ’n slim velsorgroetine sorg dat jou vel die meeste uit jou sluimeringsure kry. Die nag is die ideale tyd om bestanddele in te span wat saam met jou vel se herstel- en vernuwingsprosesse werk, soos retinoïede, alfahidroksisure, peptiede en antioksidante. “Retinoïede stimuleer die herbou van jou velstruktuur en werk die beste oornag omdat sonblootstelling die molekules minder doeltreffend maak. Daarby help ’n produk met antioksidante saans om jou vel se natuurlike voorraad, wat deur die dag ‘opgebruik’ is, aan te vul,” sê dr. Wagemaker. Snags is ook wanneer jou velprodukte die beste geabsorbeer word. “Soos wat die bloedsirkulasie na jou vel toeneem, verhoog dit die oppervlaktemperatuur.

Dit veroorsaak dat jou vel meer deurdringbaar is en die velsorgprodukte wat jy aangewend het, kan nou beter penetreer.” Ongelukkig lei dit ook daartoe dat meer vog vanuit jou vel ontsnap. ’n Ryker vogroom vol bevogtigende lipiede is dus ook ’n moet saans.