SO SÊ HULLE OP SARIE.COM
Renée Rautenbach Conradie oor haar debuutroman, Met die Vierkleur in Parys (Protea Boekhuis, R195)
Die hoofkarakter, argitek Paul Roux, maak in 1900 in Parys met die “groen fee” kennis en sy lewe ontspoor effe. Vertel meer?
Toe ek nog in Frankryk gewoon het (my man, Leo, was ’n diplomaat), het ek dikwels gedink dat die stad in 1900 seker op sy wildste was, en gewonder hoe dit moes wees vir die Suid-Afrikaners wat in daardie jaar soontoe is om aan die ZAR se paviljoen vir die Paryse Wêreldskou te werk.
Dit was ook die begin van die Art Nouveau-beweging in argitektuur. Geboue het plesierig begin lyk met ronde lyne, en toe was dit die Impressioniste, mense soos Pablo Picasso en Auguste Rodin. Hulle het almal in die Montmartre-distrik gaan woon, en absint, die groen fee, gedrink. Paul is ’n buitestander. Tuis was ons in ’n oorlog gewikkel, terwyl diegene by die skou die beste van SA moes ten toon stel.
Dit was besonder moeilik. Paul is soontoe om ’n beter argitek te word. Daar aangekom, was die gebou reeds taamlik ver gevorder. Die Franse het hom uitgeskuif en hy moes hom met die pioniershuis besig hou. Die paviljoen het uiteindelik niks van SA verteenwoordig nie.
Paul se belangstelling was in die argitek, șLouis Michelț Thibault, en die Kaapse invloed. In Parys is hy skielik blootgestel aan Art Nouveau, ’n rigting waarby SA nooit uitgekom het nie. Ek dink dit was hartseer.
Lees die volledige onderhoud met Renée op SARIE.com