Middernag, Sidney Gilroy (Human & Rousseau, R300)
Sidney Gilroy het hom reeds met sy eerste spanningsroman, Klikbek, bewys as skrywer met wie rekening gehou moet word in ’n uitdagende genre. Met sy vasbythouding is sersant
Sollie Mthembu ’n boeiende karakter. Jy wíl hê die speurder van Bloemfontein se Parkwegstasie moet slaag. Gilroy verweef die hoofstorielyn naatloos met Sollie se persoonlike verhaal en jy kan nie anders as om betrokke te voel nie.
Wanneer kaptein Brummels gevra word om die ondersoek na die moord op ’n vierjarige meisie van Harrismith te lei, besluit hy Sollie moet hom bystaan.
Op die misdaadtoneel besef Sollie daar is ooreenkomste met ’n onopgeloste saak meer as ’n dekade gelede: Die Slagter van Universitas was juis een van die redes waarom hy speurder wou word. Baie donkerte lê onder die oppervlak van die dorp en Sollie krap ’n onheilige nes van gebeure oop.
Met vele kinkels hou die verhaal jou aan die lees tot die onvoorspelbare einde. Phyllis Green