Not to Mention, Vivian de Klerk (Picador, R290)

Dié verhaal het ’n interessante formaat. Dis deels dagboek, deels memoires, en ’n brief aan ’n ma wat nooit gestuur is nie. Soos haar geheue deur haar skrywery wakker geruk word, deel die 21-jarige Katy Ferreira al hoe meer van haar diepste, donkerste geheime en leer jy haar deeglik ken.

Katy weeg 360 kg en is al vir twee jaar ’n gevangene in haar eie bed; sy kan nie meer opstaan nie. Haar ma los elke dag vir haar eet- en drinkgoed langs die bed, asook die koerant waarin sy die blokraaisel voltooi. Om die tyd te verwyl begin sy haar eie blokraaisel saamstel in ’n ou notaboek uit haar skooldae. Elke kriptiese leidraad belig ’n ontstellende gebeurtenis in haar lewe. Dis hartverskeurend om te lees hoe dit vir Katy is om “die vet meisie” te wees, hoe eet haar enigste vertroosting is. Maak jou reg vir ’n skokkende ontknoping. ’n Verrassende, onthutsende debuut deur ’n skrywer met ’n oorspronklike stem. Phyllis Green