Blinkers & blou see Ons Bruidspaar vd Jaar!

Ons troudag was absoluut perfek! Ek is seker elke paartjie dink dieselfde van hul groot dag, maar alles was presies soos ons dit visualiseer het. Ons wou graag op die strand trou en die weer (veral vir Augustus) kon nie beter gewees het nie. Dit was soos ’n somersdag. Ons wou ook ’n troue gehad het wat nie styf is nie en waar almal van die begin af saam met ons kon feesvier, en dit is presies hoe dit was. Toe ons ingestap het by die skemerkelkies in die tuin, het ons die Joodse “hora” gedans en dit het almal in ’n feestelike luim gesit. Almal het heeltyd gelag en lekker saamgekuier. Dit was ekstra spesiaal om by die lodge te trou omdat dit die huis is waarin my ouma en oupa gebly het en waar my pa grootgeword het. Vir ons was dit besonders om ons families bymekaar te hê in ’n plek wat soveel goeie herinneringe en sentimentele waarde vir ons het. – Mart-Mari

Die skoonheid van eenvoud, ’n blou see, selfs ’n geliefde hond wat spesiale oomblikke deel, maak dié troue iets besonders. Die blinkers op haar trourok wat die somerson weerkaats, word slegs deur die oënskynlike vreugde van dié gelukkige paartjie oorskadu.