Geldsake: Dié foute maak veral vroue
Kim Potgieter was meer as dertig jaar in ’n emosionele stryd gewikkel
– met geld.
Deesdae is sy ’n suksesvolle finansiële beplanner en skrywer van vier boeke oor geldsake* (haar jongste, 30 Money Mistakes Women Make and Ways to Get Back on Track, het pas as e-boek verskyn), maar selfs nou nog voel sy soms die ongemak, vrees en skaamte wat sy as jong meisie gevoel het – juis as gevolg van geld, vertel sy.
Vir Kim het dié moeilike pad in haar ouerhuis begin.
“In ons huis was my pa in beheer van die beursie – hy het vir my ma ’n toelae vir die huishouding gegee. Om bedags televisie te kyk was verbode, die vrieskas was in die garage agter geslote deure en die telefoon is toegesluit. Ek onthou nog hoe angstig ons gevoel het wanneer my ma by hom gepleit het vir ekstra geld om Kersgeskenke te koop.”
Dit was nie omdat haar pa min verdien het nie – daar was oorgenoeg. Kim het later agtergekom dit was ’n manier waarop hy haar ma kon beheer, hy het haar deur geld “geboelie”. Hy het dit ook as ’n simbool van sukses en status gebruik, weelderige partytjies by hul huis gehou en duur geskenke vir ander mense gekoop om hulle te beïndruk. “My ma het geheel en al haar mag aan my pa oorhandig. Hulle het ’n disfunksionele verhouding weens geld gehad, maar ek het steeds voor my maats hard probeer voorgee dat alles ‘normaal’ is, soos in hul ouerhuise.”
Kim se “geldstorie”, soos sy dit noem, het haar ingesteldheid oor finansies gevorm. Sy het haarself voorgeneem dat sy nooit sal toelaat dat iemand haar met geld beheer nie, en om eendag finansieel onafhanklik te wees.
Dit het baie tyd en emosionele energie geverg, maar mettertyd het Kim begin verstaan dat sy wanopvattings oor geld gehad het wat nie goed was vir haar nie.
“Ek het byvoorbeeld geglo as ek net genoeg geld het, sal ek veilig en geborge voel. Maar dit laat jou nie veilig voel nie. Geborgenheid gaan oor hoe jy binne jouself voel. Ek het ook geleer dat geld jou nie mag gee nie.
SUZETTE TRUTER
“Vandag weet ek geld is net ’n betaaleenheid. Dit het geen ander betekenis as dat dit jou in staat stel om dinge daarmee te doen nie. Dit gee jou nie status nie, dit waarborg nie liefde, gesondheid of geluk of nie. Dis net geld.”
Sy het ook foute gemaak, soos om te oorkompenseer – sy het vir haar oudste seun alles gekoop wat sy as kind moes ontbeer. Later het sy besef dat hy nie regtig wou hê wat sy gedink het nie.
Met dié nuwe insig en haar man se hulp het hulle hul twee jonger kinders met ’n meer gebalanseerde uitkyk oor die waarde van geld grootgemaak.
Kim het die afgelope twaalf jaar as finansiële beplanner (sy werk by Chartered Wealth Solutions) dikwels vroue teëgekom wat die verantwoordelikheid om hul geld te bestuur aan ander mense oorhandig het omdat hulle nie die selfvertroue of moed het om dit self te doen nie. Dikwels met rampspoedige gevolge. Juis daarom het sy haar jongste boek geskryf – om vroue te inspireer om beheer van hul eie geldsake te neem.
Natuurlik is ál meer vroue broodwinners en hoofde van huishoudings en hulle hanteer hul eie finansies, maar party vroue voel steeds gemarginaliseer as geldsake ter sprake kom, sê sy. Selfs finansiële beplanning is tradisioneel op mans gemik – wanneer paartjies met hul beplanner vergader, is die man in baie gevalle steeds die hoofkontakpersoon
(en besluitnemer) en die vrou word onbewustelik opsy geskuif.
As kind het sy sekere wanopvattings oor geld aangeleer wat haar hele benadering tot finansies bepaal het. Dit was ’n lang pad tot nuwe insigte, maar vandag help finansiële beplanner Kim Potgieter ander vroue om beheer van hul geldsake te neem
“Vroue is ook geneig om anders na finansiële beplanning te kyk – hulle stel meestal nie net in beleggingsrisiko’s, opbrengste en bates belang nie, hulle wil ook hul finansiële doelwitte en hul lewensdoelwitte integreer. Jy gaan dit nie kan doen as jy nie aanklank vind by jou beplanner of as jy voel dis ’n one-size-fits-all-benadering nie. Daarom is dit belangrik om ’n onafhanklike gesertifiseerde finansiële beplanner te kry van wie jy hou, iemand wat luister na jou insette en dit respekteer– ook jou drome en doelwitte vir jou lewe,” sê sy. >