Aktrise Daniah de Villiers: Dís die jaar om my liedjies te deel

Halfpad deur 2021 wil sy klaar wees met matriek. En dan doen wat sy régtig wil doen. “Tuisonderrig maak dat ek baie meer buigsaam is. Ek wil steeds toneelspeel, maar ook op my sangloopbaan fokus. Ek het ’n paar liedjies geskryf wat nou al te lank in my kas lê. Dís die jaar waarin ek dit met ander wil deel.”

Die 17-jarige aktrise Daniah de Villiers weet duidelik waarheen sy op pad is. Sy spog reeds met ’n titelrol in ’n internasionale film, Mia and the White Lion (2018), en plaaslik was sy te sien in treffers soos Vaselinetjie en Nul is nie niks nie asook in kykNET se Binnelanders . Ook vir háár het 2020 onverhoeds betrap. Dit was veronderstel om ’n besige jaar te wees, maar baie projekte moes uitgestel word. Sy laat haar egter nie onderkry nie.

Haar ouers het haar geleer dat niks onmoontlik is nie: “Al droom ek hoe groot, hulle het my die denkpatroon aangeleer dat ek enigiets kan bereik.”

Haar droomrol? “’n Film wat ek self geskryf het . . . ’n heldin of ’n female warrior, natuurlik.”