146 Wees gelukkig(er)!
Geluk lyk vir elkeen anders. Vir jou is dit dalk om vrede te maak met wie jy is. Of ’n netwerk vriende wat jou aanvaar nes jy is. Of die vryheid om jou grootste drome na te jaag. Wat ook al, ’n gelukkiger, meer bevredigende lewe is binne ons almal se bere
LIG DAAI VOETE
Maag in, skouers terug en swaai daai arms! Jy gaan sommer ook meer positief voel, sê wetenskaplikes. Selfs al voel jy ’n bietjie af, sal so ’n regop en energieke houding jou spreekwoordelik jou kop laat optel. Lig terselfdertyd jou mondhoeke en rugsteun dit met positiewe gedagtes. Wanneer jy glimlag asof jy dit bedoel, kan jy jou breinchemikalieë verander en gelukkiger voel.
HOE MEER SIELE . . .
Een van die vyf vernaamste dinge waaroor sterwendes spyt is, is dat hulle nie in kontak met familie en vriende gebly het nie. Dit laat jou goed voel om tyd deur te bring saam met mense wat vir jou omgee. Studies wys hoe meer sulke verbintenisse jy het, hoe gelukkiger is jy. Vind voorts maniere om by jou gemeenskap betrokke te raak en help ’n vriend in nood. Dit verbeter jou geestelike gesondheid en welstand.
SMOOR DIE KRITIKUS BINNE JOU
Daai een wat jou aanmekaar vertel alles is nie so dooddollies nie. Probeer agterkom wanneer dit beheer van jou bui oorneem. Soms het die stem ’n punt beet en laat weet jou jy moet aandag aan iets gee. Ander kere maak dit egter ’n berg van ’n molshoop. Vra jouself af: Is dit waar?
OMRING JOU MET POSITIEWE MENSE
Geweet ander se emosies is aansteeklik? Jy wil dus mense in jou lewe hê wat vol selfvertroue, gesond en positief is. Jy gaan waarskynlik agterkom dit het ’n positiewe effek op jou en laat jou goed voel. En dan kan jy weer ander met jou positiwiteit aansteek.
ONTHOU DIE ‘HOEKOM’
Wanneer jy weet wat jou doel is – hoekom jy werk, oefen of iets vir iemand anders doen – gee dit jou lewe betekenis. Dis maklik om te vergeet in die harwar van ’n gewone dag. Neem ’n oomblik om jouself daaraan te herinner. Geluk is meer as kortstondige plesier. Dit lê ook in die genoegdoening van jou doelwitte najaag.