Ons waag en vra: Hoe lyk 2021?
Geen fortuinverteller of tendenskenner sou ooit 2020 op ons planeet kon voorsien of voorspel nie. Dit was ’n jaar van malligheid, moeilikheid maar ook mooi oomblikke. Ons waag om te vra hoe 2021 gaan lyk . . .
2020
’n Jaar wat die mensdom nog lank nie gaan vergeet nie.
’n Jaar waarin ’n virus binne ’n oogwink die wêreld oorgeneem en mense na binne gedwing het, waarin ekonomieë en derduisende ondernemings, groot en klein, in duie gestort het en huwelike, vriendskappe en gemoedere tot die uiterste getoets is.
Maar tog was dit ook ’n jaar waarin die natuur ’n baie nodige blaaskans gekry en gefloreer het, gesinne kon meer tyd saam deurbring, en oral het mense klein plesiertjies soos broodbak en tuinmaak herontdek.
Dit was die jaar waarin prins
Harry en Meghan Markle, hertog en hertogin van Sussex, teruggestaan het as senior lede van die Britse koningsgesin. Megxit, soos die sage gedoop is, het byna netsoveel aandag gekry soos die planne rondom Brexit – Brittanje se veelbewoë wegstap van die Europese Unie.
Dit was die jaar waarin die Olimpiese Spele uitgestel is en die Oscars nie ’n aanbieder gehad het nie. Waarin talle toekenningsaande aanlyn gehou is. Waarin die Suid-Afrikaans gebore miljardêr-entrepreneur Elon Musk byna meer in die nuus was oor sy kind se vreemde naam (X AE A-12) as sy planne om mense op
Mars te sit, en die komediant en TV-persoonlikheid Ellen DeGeneres, eens almal se liefling, voor stok gekry is oor die toksiese werksomgewing op haar stel.
Jacques Kallis is in die Internasionale Krieketraad se Heldesaal opgeneem en Potch se motorfietsjaer Brad Binder het die MotoGP in die Tsjeggiese Republiek gewen. Teen dié tyd kon sy landsburgers darem weer alkohol en sigarette koop om dit te vier nadat Suid-Afrika vroeër in die jaar die enigste land ter wêreld was wat die verkope van albei verbied het.
Ná so ’n malle, moeilike, soms mooie jaar, hoe gaan 2021 lyk?
Met dié dat ál meer mense van die huis af werk, is loungewear gróót – en dit is hier om te bly, sê Amaria Carstens, SARIE se moderedakteur. Dink stylvolle sweetpakke of lospassende broeke en hemde, in neutrale kleure en van natuurlike stowwe soos linne.
Die fokus is op gemak, volgens
Amaria, maar dit bly stylvol genoeg om gou inkopies te gaan doen. “Of gee jou uitrusting oemf met bykomstighede, soos ’n paar kristaloorbelle.”
Maskers gaan ook nog ’n ruk lank in almal se klerekas pryk en word nou as deel van ’n uitrusting benader – vou byvoorbeeld ’n bypassende syserp dubbel en
dra dit as jou masker soos die Amerikaanse mode-beïnvloeder Olivia Palermo.
Volhoubaarheid word ook al hoe belangriker. Amaria sê modes gaan nie meer so vinnig verander nie en selfs groot modehuise soos Gucci fokus nou op seisoenlose reekse – gehalte-items wat jy langer kan dra.
Truida Norval van Port Elizabeth, ’n klerekasbeplanner en ontwerper met ’n volhoubare aanslag, sê tweedehandse en vintage-klere raak ook al hoe gewilder. “Baie mense het tydens die inperking kledingstukke op Instagram begin verkoop – vir ’n inkomste, liefdadigheid of om volhoubaarheidsredes. Dit is veral gewild aanlyn omdat die deursneemens nie sommer ’n liefdadigheidswinkel besoek nie. Maar ook dít is aan’t verander, want nuwe, volhoubare klere van etiese bronne is baie duur.”